అక్షరటుడే, వెబ్డెస్క్: WPL-2026 | ఉమెన్స్ ప్రీమియర్ లీగ్ (WPL) 2026 సీజన్ ఉత్కంఠభరిత దశకు చేరుకుంది. టోర్నీలో అత్యంత కన్సిస్టెన్సీతో రాణిస్తున్న ఢిల్లీ క్యాపిటల్స్ Delhi Capitals జట్టు మరోసారి ఫైనల్లోకి అడుగుపెట్టింది. గుజరాత్ జెయింట్స్ Gujarat Giants తో జరిగిన ఎలిమినేటర్ మ్యాచ్లో 7 వికెట్ల తేడాతో ఘన విజయం సాధించిన ఢిల్లీ, తుది పోరులో రాయల్ ఛాలెంజర్స్ బెంగళూరును ఎదుర్కొనడానికి సిద్ధమైంది. కొత్త సారథి జెమిమా రోడ్రిగ్స్ నాయకత్వంలో ఢిల్లీ జట్టు వరుసగా నాలుగో సీజన్లోనూ ఫైనల్ చేరడం విశేషం. అయితే గత మూడు ఫైనల్స్లో ఓటమి చవిచూసిన ఢిల్లీ ఈసారి కప్పు కొట్టాలన్న పట్టుదలతో ఉంది. వడోదర వేదికగా జరిగిన ఎలిమినేటర్ మ్యాచ్లో తొలుత బ్యాటింగ్ చేసిన గుజరాత్ జెయింట్స్ 20 ఓవర్లలో 7 వికెట్ల నష్టానికి 168 పరుగులు చేసింది.
WPL-2026 | చరిత్ర సృష్టిస్తారా..
స్టార్ ఓపెనర్ బెత్ మూనీ అద్భుతంగా ఆడి 62 పరుగులతో నాటౌట్గా నిలిచింది. ప్రారంభంలోనే 59 పరుగులకే 4 వికెట్లు కోల్పోయిన గుజరాత్ను Gujarat ఆమె ఒక్కతే నిలబెట్టింది. మరోవైపు జార్జియా వేర్హామ్ 35 పరుగులతో సహకరించింది. ఢిల్లీ బౌలర్లలో షెనెల్లె హెన్రీ మూడు వికెట్లు తీసి ప్రత్యర్థిని కట్టడి చేయగా, భారత యువ బౌలర్ నందిని శర్మ రెండు వికెట్లు పడగొట్టి కీలక పాత్ర పోషించింది.
లక్ష్య ఛేదనలో ఢిల్లీ ఓపెనర్లు లిజెల్ లీ, షఫాలీ వర్మ మెరుపు ఆరంభం ఇచ్చారు. కేవలం 7 ఓవర్లలోనే 89 పరుగుల భాగస్వామ్యాన్ని నెలకొల్పి మ్యాచ్ను ఢిల్లీ వైపు తిప్పేశారు. వీరిద్దరూ అవుటైన తర్వాత కెప్టెన్ జెమిమా రోడ్రిగ్స్, లారా వోల్వార్డ్ట్ జట్టు బాధ్యతలు తీసుకుని మరో 68 పరుగులు జోడించారు. 16వ ఓవర్లో వోల్వార్డ్ట్ కొట్టిన బౌండరీతో ఢిల్లీ విజయం ఖరారైంది. మొత్తం మీద బ్యాటింగ్, బౌలింగ్ విభాగాల్లో సమిష్టి ప్రదర్శనతో ఢిల్లీ ఫైనల్ బెర్త్ను దక్కించుకుంది.
ఇప్పుడు ఫిబ్రవరి 5 గురువారం జరగనున్న ఫైనల్ మ్యాచ్లో ఢిల్లీ క్యాపిటల్స్ జట్టు రాయల్ ఛాలెంజర్స్ బెంగళూరుతో తలపడనుంది. ఆర్సీబీ తమ రెండో టైటిల్ కోసం పోరాడుతుండగా, ఢిల్లీ మాత్రం తొలి కప్ సాధించాలని సంకల్పించింది. ఈ ఫైనల్ రెండు సంవత్సరాల క్రితం జరిగిన ఢిల్లీ–బెంగళూరు Bangalore తుది పోరును తలపిస్తోంది. అప్పట్లో ఆర్సీబీ విజేతగా నిలిచింది. ఈసారి ఆ ఓటమికి ప్రతీకారం తీర్చుకుని చరిత్ర సృష్టించాలనే లక్ష్యంతో ఢిల్లీ బరిలోకి దిగనుంది. దీంతో ఈ మ్యాచ్పై అభిమానుల్లో భారీ ఆసక్తి నెలకొంది.
