అక్షరటుడే, వెబ్డెస్క్: Vijaywada | విజయవాడ ఇంద్రకీలాద్రిపై ఉన్న శ్రీ దుర్గమ్మ ఆలయంలో (Sri Durgamma Temple) చోటు చేసుకున్న ఘటన భక్తుల్లో ఆందోళనకు కారణమైంది. ఆలయంలో నిర్వహించే శ్రీచక్ర నవావరణార్చన పూజ సమయంలో వినియోగించిన పాలల్లో పురుగులు కనిపించడంతో ఒక్కసారిగా కలకలం నెలకొంది.
ఈ సంఘటనతో అప్రమత్తమైన ఆలయ యాజమాన్యం వెంటనే చర్యలకు దిగింది. శుక్రవారం నిర్వహించిన ప్రత్యేక పూజలో ఈ విషయం బయటపడడంతో, పూజా కార్యక్రమాలను తాత్కాలికంగా నిలిపివేశారు. అనంతరం ఘటనపై సమగ్ర విచారణ చేపట్టాలని నిర్ణయించారు. దేవస్థాన స్థానాచార్యుల పర్యవేక్షణలో అసిస్టెంట్ కమిషనర్ (Assistant Commissioner), ఏఈవోలు, సూపరింటెండ్లతో కూడిన ఐదుగురు సభ్యుల కమిటీని ఏర్పాటు చేశారు. ఈ కమిటీ ఆలయ అర్చకులు, స్టోర్ విభాగం, పూజా విభాగం సిబ్బందిని విచారించి వివరాలు సేకరించింది.
Vijaywada | అపచారం..
విచారణలో అభిషేకానికి ఉపయోగించిన పాత్ర పరిశుభ్రంగా లేకపోవడం వల్లే ఈ పరిస్థితి ఏర్పడినట్టు తేలింది. ఆ బిందెలోనే పాలను పోసి పూజ నిర్వహించడంతో సమస్య తలెత్తిందని కమిటీ నిర్ధారించింది. అలాగే సంబంధిత విభాగాల్లోని సిబ్బంది నిర్లక్ష్యం కూడా కారణమని నివేదికలో పేర్కొన్నారు. ఈ అంశంపై బాధ్యత వహించిన అర్చకుడికి ఆలయ అధికారులు మెమో జారీ చేసి, ఆయనను ఇతర సేవల పర్యవేక్షణ బాధ్యతలకు మార్చారు. స్టోర్ మరియు పూజా విభాగాల సిబ్బందిని వివరణ ఇవ్వాలని ఆదేశించారు. ఈ సంఘటనపై రూపొందించిన పూర్తి నివేదికను త్వరలోనే దేవాదాయ శాఖ కమిషనర్కు (Endowments Department Commissioner) పంపనున్నట్లు ఆలయ ఈవో తెలిపారు.
ఇకపై ఆలయంలో జరిగే పూజలు, అభిషేకాల్లో మరింత జాగ్రత్తలు తీసుకుంటామని ఆలయ అధికారులు స్పష్టం చేశారు. ఇప్పటివరకు వాడుతున్న టెట్రా పాల ప్యాకెట్లను నిలిపివేసి, శుద్ధమైన ఆవు పాలను (Cow Milk) మాత్రమే వినియోగించాలని నిర్ణయించారు. భక్తుల విశ్వాసానికి భంగం కలగకుండా నాణ్యత, పరిశుభ్రత విషయంలో కఠినంగా వ్యవహరిస్తామని ఆలయ యాజమాన్యం భరోసా ఇచ్చింది.
