PM Modi Tour | శ్రీశైలంలో పర్యటించనున్న ప్రధాని.. పూర్తి షెడ్యూల్​ ఇదే..

అక్షరటుడే, వెబ్​డెస్క్ : PM Modi Tour | ప్రధాన మంత్రి నరేంద్ర మోదీ గురువారం ఆంధ్ర ప్రదేశ్​ (AP)లోని కర్నూల్​ జిల్లాలో పర్యటించనున్నారు. శ్రీశైలం (Srisailam) మల్లికార్జున స్వామి ఆలయంలో ఆయన పూజలు చేస్తారు. ఈ మేరకు ప్రధాని షెడ్యూల్​ను పీఎంవో విడుదల చేసింది.

ప్రధాని గురువారం (ఈ నెల 16న) ఉదయం 7.20 గంటలకు ఢిల్లీ నుంచి ప్రత్యేక విమానంలో వస్తారు. ఉదయం 9.50 గంటలకు కర్నూలు చేరుకుంటారు. అక్కడి నుంచి హెలికాప్టర్​లో సున్నిపెంటకు వెళ్తారు. అక్కడి నుంచి రోడ్డు మార్గంలో ఉదయం 10:55కు శ్రీశైలం భ్రమరాంబ గెస్ట్‌ హౌస్‌కు ప్రధాని చేరుకుంటారు. మల్లికార్జున స్వామి (Mallikarjuna Swamy)ని దర్శించుకుంటారు. శివాజీ స్ఫూర్తి కేంద్రాన్ని సందర్శించారు. మధ్యాహ్నం 1:20కి మళ్లీ భ్రమరాంబ గెస్ట్​ హౌస్​ నుంచి రోడ్డు మార్గంలో సున్నిపెంటకు వెళ్తారు. మధ్యాహ్నం 2:30 గంటలకు నన్నూరు గ్రామంలో జరిగే సమావేశంలో ఆయన ప్రసంగిస్తారు. పలు అభివృద్ధి పనులకు శంకుస్థాపన చేస్తారు. అనంతరం సాయంత్రం 4:45 గంటలకు కర్నూల్ నుంచి తిరిగి ఢిల్లీకి పయనం అవుతారు.

PM Modi Tour | అభివృద్ధి పనులకు శంకుస్థాపన

ప్రధాని మోదీ ఏపీ పర్యటనలో భాగంగా పలు అభివృద్ధి పనులకు శంకుస్థాపన చేస్తారు. కర్నూలు (Kurnool)లో సుమారు రూ.13,430 కోట్ల విలువైన అభివృద్ది కార్యక్రమాలకు శంకుస్థాపనలు, ప్రారంభోత్సవాలు చేస్తారు. రూ.2,880 కోట్లతో చేపట్టనున్న కర్నూలు-3 పూలింగ్‌ స్టేషన్‌ని అనుసంధానించే ట్రాన్స్‌మిషన్‌ వ్యవస్థకు మోదీ శంకుస్థాపన చేయనున్నారు. ఓర్వకల్‌, కొప్పర్తి పారిశ్రామిక కారిడార్లలో పనులకు, పాపాఘ్ని నదిపై నిర్మించిన వంతెనకు, ఎస్‌.గుండ్లపల్లి – కనిగిరి బైపాస్‌కు శంకుస్థాపన చేస్తారు.

PM Modi Tour | శ్రీశైలంలో ఆంక్షలు

ప్రధాని మోదీ శ్రీశైలం ఆలయాన్ని దర్శించుకోనున్న నేపథ్యంలో అధికారులు ఆంక్షలు అమలు చేయనున్నారు. ఇప్పటికే కేంద్ర బలగాలు ఆలయం పరిసరాల్లో మోహరించాయి. శ్రీశైలం రహదారిపై సైతం ఆంక్షలు అమలులో ఉంటాయి. ఉదయం 9 గంటల నుంచి మధ్యాహ్నం 2 గంటల వరకు శ్రీశైలం రాకపోకలు నిలిపివేయనున్నట్లు అధికారులు తెలిపారు. హైదరాబాద్‌- శ్రీశైలం, దోర్నాల- శ్రీశైలం రహదారి మార్గాల్లో వాహన రాకపోకలను నిలిపివేస్తామని తెలిపారు. ప్రజలు సహకరించాలని కోరారు.