అక్షరటుడే, వెబ్డెస్క్ : Maoists Surrender | మావోయిస్టుల లొంగుబాట్లు కొనసాగుతున్నాయి. కేంద్ర బలగాలు చొచ్చుకు వస్తుండడం, కీలక నేతలు నేలకొరుగుతుండడంతో నక్సల్స్ లొంగిపోతున్నారు. ప్రభుత్వాలు సైతం పునరావాసం కల్పిస్తుండడంతో ఆయుధాలను వీడుతున్నారు. తాజాగా ఛత్తీస్గఢ్లో 37 మంది మావోయిస్టులు లొంగిపోయారు.
దంతేవాడ ఎస్పీ ఆఫీస్‌లో ఆదివారం 37 మంది సరెండర్ అయ్యారు. వారిపై రూ.67 లక్షల రివార్డు ఉన్నట్లు అధికారులు తెలిపారు. మావోయిస్టుల లొంగుబాట్లను ప్రోత్సహించడానికి ఛత్తీస్గఢ్ ప్రభుత్వం (Chhattisgarh Government) “పూనా మార్గెమ్” (పునరావాసం నుంచి సామాజిక పునరేకీకరణ వరకు) కార్యక్రమం నిర్వహిస్తోంది. ఇందులో భాగంగా చాలా మంది సరెండర్ అవుతున్నారు. తాజాగా.. 37 మంది లొంగిపోయారని, వారిలో 12 మంది మహిళలు ఉన్నట్లు దంతేవాడ పోలీసు సూపరింటెండెంట్ గౌరవ్ రాయ్ తెలిపారు.
Maoists Surrender | కీలక నేతలు
లొంగిపోయిన వారిలో కీలక నేతలు కుమాలి అలియాస్ అనితా మాండవి, గీతా అలియాస్ లక్ష్మి మడ్కం, రంజన్ అలియాస్ సోమా మాండవి, భీమా అలియాస్ జహాజ్ కల్ము ఉన్నారు. వారందరిపై రూ.8 లక్షల రివార్డు ఉందని తెలిపారు. ప్రభుత్వ పునరావాస విధానం ప్రకారం.. లొంగిపోయిన కార్యకర్తలకు ఒక్కొక్కరికి రూ. 50 వేల తక్షణ సహాయంతో పాటు నైపుణ్యాభివృద్ధికి శిక్షణ, వ్యవసాయ భూమి మొదలైన ఇతర సౌకర్యాలు అందించనున్నట్లు వెల్లడించారు. గత 20 నెలల్లో దంతేవాడ జిల్లాలో 508 మందికి పైగా మావోయిస్టులు లొంగిపోయారని చెప్పారు.
Maoists Surrender | హిడ్మా ఎన్కౌంటర్తో..
దేశంలో 2026 మార్చి 31 వరకు మావోయిస్ట్లను లేకుండా చేస్తామని కేంద్రం ప్రకటించింది. ఈ మేరకు ఆపరేషన్ కగార్ చేపట్టింది. ఇందులో భాగంగా వేల సంఖ్యలో బలగాలు అడవులను జల్లెడ పడుతున్నాయి. కీలక నేతలే లక్ష్యంగా ఆపరేషన్లు చేపడుతున్నాయి. మరోవైపు ఆయా రాష్ట్ర ప్రభుత్వాల ఇంటెలిజెన్స్ విభాగాలు లొంగుబాట్లను ప్రోత్సహిస్తున్నాయి. దీంతో మావోయిస్ట్ పార్టీ (Maoist Party) బలహీనంగా మారింది. ఈ ఏడాది మే నెలలో పార్టీ ప్రధాన కార్యదర్శి బస్వరాజ్ అలియాస్ నంబాల కేశవరావు ఎన్కౌంటర్లో చనిపోయారు. ఆ తర్వాత పలువురు కీలక నేతలు హతం అయ్యారు. దీంతో పార్టీలో చీలిక వచ్చి లొంగుబాట్లు పెరిగాయి.
పార్టీ పొలిట్ బ్యూరో సభ్యులు మల్లోజుల వేణుగోపాల్ (Mallojula Venugopal), ఆశన్న తమ అనుచరులతో లొంగిపోయారు. ఇటీవల ఆంధ్రప్రదేశ్లోని అల్లూరి జిల్లా మారేడ్మిల్లి అటవీ ప్రాంతంలో జరిగిన ఎన్కౌంటర్లలో మావోయిస్ట్ కీలక నేత, మోస్ట్ వాంటెడ్ మాడ్వి హిడ్మా (Madvi Hidma), ఆయన భార్య రాజే, టెక్ శంకర్ తదితరులు చనిపోయారు. హిడ్మా మృతి అనంతరం లొంగుబాట్లు పెరిగాయి. ఇప్పటికే మహారాష్ట్ర–మధ్యప్రదేశ్–ఛత్తీస్గఢ్ జోనల్ కమిటీ జనవరి 1న అందరం లొంగిపోతామని లేఖ విడుదల చేసింది. దీంతో త్వరలోనే దేశంలో మావోయిస్ట్ పార్టీ కనుమరుగు కానుంది.
