అక్షరటుడే, వెబ్డెస్క్: Swap your maida | నేటి ఉరుకుల పరుగుల జీవితంలో త్వరిత ఆహార అలవాట్లు పెరిగిపోయింది. మనం తినే బ్రెడ్లు, బిస్కెట్లు, సమోసాలు, కేకులు.. ఇలా దేనిని చూసినా అందులో మైదా పిండి ప్రధానంగా కనిపిస్తుంది. రుచిగా ఉంటుందన్న కారణంతో చాలామంది దీనిని వాడుతుంటారు కానీ, మైదా వల్ల కలిగే అనారోగ్యాలు అన్నీ ఇన్నీ కావు. అతిగా ప్రాసెస్ చేయడం వల్ల ఇందులో పోషకాలు నశించి, కేవలం రక్తంలోని చక్కెర స్థాయిలను పెంచే గుణం మాత్రమే మిగులుతుంది. అందుకే ఆరోగ్య నిపుణులు మైదాను పక్కన పెట్టి, మన పూర్వీకులు వాడిన సంప్రదాయ పిండి పదార్థాలను ఆహారంలో చేర్చుకోమని సూచిస్తున్నారు.
రాగి పిండి: Swap your maida | ప్రస్తుతం ఆరోగ్యంపై స్పృహ ఉన్నవారు రాగి పిండికి పెద్దపీట వేస్తున్నారు. ఇందులో ఉండే కాల్షియం ఎముకల పుష్టికి, ఐరన్ రక్తహీనత నివారణకు అద్భుతంగా పనిచేస్తాయి. మైదా లాగా ఇది సాగే గుణాన్ని కలిగి ఉండదు, కాబట్టి జీర్ణక్రియకు సులభంగా ఉంటుంది. రాగి పిండితో రొట్టెలు, అంబలి మాత్రమే కాకుండా రుచికరమైన లడ్డూలు కూడా తయారు చేసుకోవచ్చు.
ఓట్స్ పిండి: Swap your maida | ఊబకాయం లేదా బరువు తగ్గాలనుకునే వారికి ఓట్స్ పిండి ఒక వరం. ఇందులో పిండి పదార్థాలు తక్కువగా, పీచు పదార్థం, ప్రోటీన్లు ఎక్కువగా ఉంటాయి. ఇది తిన్న తర్వాత చాలా సేపు కడుపు నిండుగా ఉన్న అనుభూతిని కలిగిస్తుంది, తద్వారా అనవసరమైన ఆకలిని తగ్గిస్తుంది. దీనితో ప్యాన్ కేకులు, కుకీలు, మసాలా వడలు వంటి వెరైటీ వంటకాలు ప్రయత్నించవచ్చు.
జొన్న పిండి: Swap your maida | ఒకప్పుడు దక్షిణ భారత దేశంలో ప్రధాన ఆహారంగా ఉన్న జొన్నలు, మధ్యలో కనుమరుగైనా ఇప్పుడు మళ్ళీ ప్రాచుర్యంలోకి వచ్చాయి. జొన్న పిండి జీర్ణశక్తిని పెంచడంలో మేటి. మధుమేహం ఉన్నవారికి, బరువు నియంత్రణలో ఉండాలనుకునే వారికి ఇది మంచి ఎంపిక. జొన్న రొట్టెలు, దోశలు, ఉప్మా వంటివి నిత్యం తీసుకోవడం వల్ల శరీరానికి కావాల్సిన ఖనిజ లవణాలు అందుతాయి.
గోధుమ పిండి: Swap your maida | మైదా పిండిని గోధుమల నుంచే తయారు చేసినప్పటికీ, దానిని తెల్లగా మార్చడానికి రసాయనాలను ఉపయోగిస్తారు. దానికి బదులుగా నేరుగా గోధుమ పిండిని వాడటం ఎంతో శ్రేయస్కరం. ఇందులో బి-విటమిన్లు, ఫైబర్ సమృద్ధిగా ఉంటాయి. భారతీయ వంటకాల్లో గోధుమ పిండికి ఎప్పట్నుంచో ప్రత్యేక స్థానం ఉంది.
వీటితో పాటు శెనగ పిండి, బాదం పిండి వంటి రకాలను కూడా వంటల్లో వాడటం వల్ల రుచికి రుచి, ఆరోగ్యానికి ఆరోగ్యం లభిస్తాయి. మైదాను దూరం పెట్టి, ఈ ప్రకృతి సిద్ధమైన పిండి రకాలను ఆహారంలో భాగం చేసుకోవడం ద్వారా దీర్ఘకాలిక వ్యాధుల నుండి మనల్ని మనం కాపాడుకోవచ్చు.
