అక్షరటుడే, వెబ్డెస్క్ : Hand Writing | డిజిటల్ యుగంలో చేతిరాత కళ క్రమంగా అరుదైపోతున్నప్పటికీ, నేపాల్ (Nepal)కు చెందిన 16 ఏళ్ల ప్రకృతి మల్లా తన అద్భుతమైన కాలిగ్రఫీతో ప్రపంచాన్ని ఆశ్చర్యపరిచింది.
ప్రపంచంలోనే అత్యంత అందమైన చేతిరాత కలిగిన అమ్మాయిగా గుర్తింపు పొందిన ప్రకృతి రాసిన 8వ తరగతి స్కూల్ అసైన్మెంట్ పేజీ ఇంటర్నెట్లో వైరల్గా మారడంతో ఆమె పేరు ప్రపంచవ్యాప్తంగా మారుమోగింది. ఆ పేజీలో కనిపించిన అక్షరాల స్పష్టత, సమతౌల్యం, శిల్పకళను తలపించే ఆకృతి నెటిజన్లను మంత్రముగ్ధులను చేసింది. డిజిటల్ స్క్రీన్లు, కీబోర్డులు ఆధిపత్యం సాగుతున్నతరం మధ్య, చేతిరాతను ఇంత కళాత్మకంగా తీర్చిదిద్దిన ప్రకృతి (Prakriti Malla) అంకితభావానికి విశేష ప్రశంసలు లభించాయి.
Hand Writing | అత్యుత్తమ రాత..
నేపాల్లోని బీరేంద్ర సైనిక్ ఆవాసియ మహావిద్యాలయం (Sainik Awasiya College)లో చదువుకున్న ఆమె దేశంలోనే అత్యుత్తమ చేతిరాత కలిగిన విద్యార్థినిగా స్కూల్ స్థాయిలోనే గుర్తింపు పొందింది. స్కూల్ అసైన్మెంట్గా రాసిన ఆ ఇంగ్లీష్ పేజీ వైరల్ కావడంతో ప్రపంచవ్యాప్తంగా ఆమెకు అభినందనలు వెల్లువెత్తాయి. ప్రకృతి ప్రతిభ అక్కడే ఆగిపోలేదు. యునైటెడ్ అరబ్ ఎమిరేట్స్ 51వ ‘స్పిరిట్ ఆఫ్ ది యూనియన్’ వేడుకల సందర్భంగా, ఆమె చేతిరాతతో రాసిన ప్రత్యేక అభినందన లేఖను ఖాట్మండులోని యూఏఈ ఎంబసీ (UAE Embassy)కి స్వయంగా అందజేసింది. లేఖలోని అద్భుతమైన కాలిగ్రఫీ చూసి ముచ్చటపడిన ఎంబసీ అధికారులు, ఆమెను “ప్రపంచంలోనే అత్యంత అందమైన చేతిరాత కలిగిన అమ్మాయి”గా ప్రశంసిస్తూ సోషల్ మీడియాలో పంచుకున్నారు.
దీంతో ప్రకృతి ప్రతిభ మరోసారి అంతర్జాతీయ స్థాయి (International Level)లో చర్చనీయాంశమైంది. ఆమెకు నేపాలీ సాయుధ పోలీసు దళం, నేపాల్ ప్రభుత్వం (Nepal Government) తదితరులు ప్రత్యేకంగా అభినందనలు తెలపడం విశేషం. ఆమె రచన నేపాల్లోనే కాకుండా మొత్తం ప్రపంచంలోనే అత్యుత్తమంగా పేరుగాంచింది.నేపాల్ ప్రభుత్వం ఆమె కు ఉత్తమ నగీషీరాత అని కూడా ప్రశంసించింది.
