అక్షరటుడే, వెబ్డెస్క్ : WEF 2026 | తెలంగాణలో రూ.6 వేల కోట్ల స్మాల్ మాడ్యులర్ రియాక్టర్ (SMR) ఆధారిత స్వచ్ఛ ఇంధన ప్రాజెక్టును అభివృద్ధి చేయడానికి స్లోవేకియాకు చెందిన న్యూక్లియర్ సంస్థ ముందుకొచ్చింది. ఈ మేరకు రాష్ట్ర ప్రభుత్వంతో ఒప్పందం చేసుకుంది.
స్లోవేకియాకు చెందిన ఐక్యూ క్యాపిటల్ (IQ Capital), భారత్కు చెందిన గ్రీన్ హౌస్ ఎన్విరో (Green House Enviro) సంయుక్తంగా న్యూక్లియర్ ప్రొడక్ట్స్ అనే సంస్థను ఏర్పాటు చేశాయి. ఈ సంస్థ తెలంగాణలో 300 మెగావాట్ల సామర్థ్యంతో స్మాల్ మాడ్యులర్ రియాక్టర్ (SMR) ఆధారిత స్వచ్ఛ ఇంధన ప్రాజెక్టును అభివృద్ధి చేసే అవకాశాలను అన్వేషించడానికి ఆసక్తి వ్యక్తీకరణ పత్రాన్ని (EOI) సమర్పించింది. ఈ ప్రాజెక్టును రూ.6 వేల కోట్ల పెట్టుబడి అవుతుందని అంచనా వేశారు. ఐక్యూ క్యాపిటల్ గ్రూప్ ఛైర్మన్ జాన్ బాబిక్, సీఈఓ అనిల్ కుమార్ బావిశెట్టి, గ్రీన్ హౌస్ ఎన్విరో సీఈఓ మొలుగు శ్రీపాల్ రెడ్డి, ముఖ్యమంత్రి రేవంత్ రెడ్డి (CM Revanth Reddy) నేతృత్వంలోని ‘తెలంగాణ రైజింగ్’ ప్రతినిధి బృందంతో జరిగిన సమావేశంలో ఈ ఆసక్తి వ్యక్తీకరణ పత్రాన్ని అందజేశారు.
WEF 2026 | రూ.వెయ్యి కోట్లు పెట్టనున్న ‘సర్గడ్’
అమెరికాకు చెందిన సర్గడ్ (Sargad) తెలంగాణతో అవగాహన ఒప్పందం కుదుర్చుకుంది. 3 నుంచి 5 సంవత్సరాలలో రూ. 1,000 కోట్లు పెట్టుబడి పెట్టనుంది. సర్గడ్ వ్యవస్థాపకుడు, సీఈవో WEF 2026లో ‘తెలంగాణ రైజింగ్’ ప్రతినిధి బృందాన్ని కలిశారు. అమెరికాకు చెందిన ఆపరేటర్ నేతృత్వంలోని పారిశ్రామిక. పెట్టుబడి వేదిక అయిన సర్గడ్ రాష్ట్రంలో దీర్ఘకాలిక, దశలవారీ పెట్టుబడి, పర్యావరణ వ్యవస్థ అభివృద్ధి కార్యక్రమాన్ని అన్వేషించడానికి ముందుకు వచ్చింది. ఈ కంపెనీకి ఏరోస్పేస్, రక్షణ, ఆటోమోటివ్ మరియు అధునాతన తయారీ రంగాలలో అనుభవం ఉంది.
