అక్షరటుడే, ఎల్లారెడ్డి : Yellareddy | పంచాయతీ ఎన్నికల్లో (Panchayat Elections) భాగంగా రెండో విడత నామినేషన్ల స్వీకరణ ఆదివారం ప్రారంభించారు. 197 గ్రామ పంచాయతీల కోసం 57 కేంద్రాల్లో అవసరమైన అన్ని ఏర్పాట్లను అధికారులు పూర్తి చేశారు. ఇప్పటికే మొదటి విడతలో కామారెడ్డి డివిజన్ (Kamareddy Division)లోని పది మండలాల్లో నామినేషన్ల స్వీకరణ ప్రక్రియను అధికారులు శనివారం సాయంత్రం వరకు పూర్తి చేశారు.
నేటి నుంచి డిసెంబర్ 2వ తేదీ వరకు రెండో విడత ఎల్లారెడ్డి (Yellareddy) డివిజన్లోని ఎల్లారెడ్డి, నాగిరెడ్డిపేట్, గాంధారి, లింగంపేట్, బాన్సువాడ డివిజన్లోని పిట్లం, నిజాంసాగర్, మహమ్మద్నగర్ మండలాల్లో పరిధిలో 197 సర్పంచ్ స్థానాలు, 1654 వార్డు స్థానాలకు నామినేషన్లు (Nominations) స్వీకరించనున్నారు. ఉదయం 10.30 గంటల నుంచి సాయంత్రం 5.00 గంటల వరకు నామినేషన్ల స్వీకరణ కేంద్రాల్లో నామపత్రాలు తీసుకోనున్నారు. అన్ని కేంద్రాలలో హెల్ప్ డెస్క్లు అందుబాటులో ఉంచారు. ఎలాంటి తప్పిదాలకు తావులేకుండా పకడ్బందీగా నిర్వహించేందుకు అధికారులు చర్యలు చేపట్టారు.
