అక్షరటుడే, హైదరాబాద్ : Atukula Bathukamma | తెలంగాణ(Telangana)లో బతుకమ్మ సంబరాలు ఘనంగా ప్రారంభమయ్యాయి.మహాలయ అమావాస్య రోజు ఎంగిలి పూల బతుకమ్మ(Engili Poola Bathukamma) ఉత్సవం ముగిసింది. తొమ్మిది రోజులపాటు సాగే ఈ వేడుకల్లో భాగంగా, రెండో రోజు ‘అటుకుల బతుకమ్మ’ పండుగను జరుపుకుంటారు.
ఆశ్వయుజ శుద్ధ పాడ్యమి రోజున వచ్చే ఈ పండుగను మహిళలు, చిన్నారులు ఎంతో ఉత్సాహంగా జరుపుకుంటారు. బతుకమ్మ చుట్టూ ఆడిపాడిన తర్వాత, పెద్దలు అందరికి బెల్లం, అటుకులు పంచిపెడతారు. ఈ నైవేద్యాన్ని పిల్లలు ఎంతో ఇష్టంగా తింటారు. అటుకులనే నైవేద్యంగా సమర్పిస్తారు కాబట్టి ఈ రోజును అటుకుల బతుకమ్మ(Atukula Bathukamma) అంటారు.
ఈ రోజున మహిళలు తలంటు స్నానం చేసి ఇళ్ళు శుభ్రం చేస్తారు. ఆ తర్వాత తంగేడు, గునుగు వంటి పూలతో రెండు వరుసల్లో బతుకమ్మను పేరుస్తారు. బతుకమ్మను పేర్చిన తర్వాత గౌరమ్మను కూడా తయారుచేస్తారు. ఈ అటుకుల బతుకమ్మ వేడుకల్లో పెద్దల కంటే పిల్లలే ఎక్కువ ఉత్సాహంగా పాల్గొంటారు. ఈ రోజున మహిళలు వాయినాలు కూడా ఇచ్చిపుచ్చుకుంటారు.తెలంగాణ సంస్కృతి,సంప్రదాయాలకు ప్రతీకగా నిలిచే బతుకమ్మ పండుగను ప్రభుత్వ,ప్రైవేట్ పాఠశాలల్లో ఘనంగా నిర్వహించారు.ఈ వేడుకల్లో భాగంగా విద్యార్థులు పూలతో బతుకమ్మ(Bathukamma)ను అందంగా పేర్చి,కోలాటాలు,దాండియా నృత్యాలతో పాఠశాల ప్రాంగణాలను ఉత్సహాభరితంగా చేశారు.రంగురంగుల సంప్రదాయ దుస్తులు ధరించిన విద్యార్ధులు ప్రత్యేక ఆకర్షణగా నిలిచి అందరినీ ఆకట్టుకున్నారు.
