అక్షరటుడే, వెబ్డెస్క్ : Telangana Police | హైదరాబాద్ (Hyderabad) నగర పోలీస్ వాహనాలపై స్టిక్కర్లను అధికారులు మారుస్తున్నారు.
బీఆర్ఎస్ (BRS) హయాంలో పోలీస్ వాహనాలపై తెలంగాణ స్టేట్ పోలీస్ అని ఉండేది. ప్రస్తుతం తెలంగాణ పోలీస్ అనే స్టిక్కర్లను అతికించారు. కాంగ్రెస్ అధికారంలోకి వచ్చాక టీఎస్ (TS) బదులు టీజీ (TG) అని వాడాలని ఆదేశాలు జారీ చేసింది. వాహనాల నంబర్ ప్లేట్లపై కూడా గతంలో టీఎస్ అని ఉండగా.. ఇప్పుడు టీజీ వస్తుంది. బీఆర్ఎస్ హయాంలో టీఎస్ అంటే తెలంగాణ స్టేట్ అని పేర్కొన్నారు. అయితే టీఎస్ అని పెట్టడంపై గతంలో విమర్శలు వచ్చాయి. టీఆర్ఎస్ను సూచించే విధంగా టీఎస్ అని పెట్టారని పలువురు ఆరోపించారు. ఈ క్రమంలో కాంగ్రెస్ అధికారంలోకి రావడంతో సీఎం రేవంత్రెడ్డి (CM Revanth Reddy ) టీజీ అనే ఉండాలని ఆదేశించారు. ఈ మేరకు పోలీస్ వాహనాల స్టిక్కర్లను సైతం మారుస్తున్నారు.
Telangana Police | 188 వాహనాల కోసం..
హైదరాబాద్ సిటీ పోలీసుల (City Police) పరిధిలో మొత్తం 188 వాహనాలకు కొత్త స్టిక్కర్లు ఏర్పాటు చేయాలని అధికారులు నిర్ణయించారు. ప్రస్తుతం పోలీసులు ఇన్నోవా కార్లను వినియోగిస్తున్న విషయం తెలిసిందే. వాటికి కొత్త స్టిక్కర్లు వేయడంతో పాటు పాలిషింగ్, డెంటింగ్, పెయింటింగ్ చేయిస్తున్నారు. దీని కోసం ప్రభుత్వం రూ.1.6 కోట్లు కేటాయించింది. తాజాగా కొత్త రూపు సంతరించుకున్న 134 వాహనాలు పెట్రోలింగ్ సేవల్లో ఆదివారం తిరిగి చేరాయి. టీఎస్ నుంచి టీజీకి మార్పులో భాగంగా తెలంగాణ పోలీస్ అనే స్టిక్కర్లను పోలీస్ వాహనాలకు అతికించారు.
