అక్షరటుడే, ఇందూరు : Bheemgal BRS | జిల్లాల్లో ఏళ్లుగా సాగిన ఇసుక దందాలో కల్వకుంట్ల కవిత రూ.వేల కోట్లు దోచుకున్నారని.. కానీ ప్రశాంత్రెడ్డి ఎలాంటి అవినీతి జోలికి వెళ్లలేదని బీఆర్ఎస్ నాయకులు అన్నారు. ఈ మేరకు జిల్లాకేంద్రంలోని ప్రెస్క్లబ్లో విలేకరుల సమావేశం నిర్వహించారు.
ఈ సందర్భంగా వారు మాట్లాడుతూ.. కవిత (Kalvakuntla Kavitha) బీఆర్ఎస్లో ఉన్నప్పుడు ప్రశాంత్ రెడ్డి మంచోడు.. ఇప్పుడు మీరు పార్టీ బయటకు వెళ్లారు కాబట్టి చెడ్డోడు అయ్యాడా అని ప్రశ్నించారు. తెలంగాణ ఉద్యమం ప్రారంభమైనప్పుడు ప్రశాంత్రెడ్డి (Prashanth Reddy) ఉన్నారని.. కానీ కవిత ఆ సమయంలో అమెరికాలో ఉన్నారన్నారు. ఉద్యమానికి, బీఆర్ఎస్ పార్టీకి, తెలంగాణ జాగృతికి సైతం ఆర్థికసాయం చేసిన వ్యక్తి ప్రశాంత్రెడ్డి అని బీఆర్ఎస్ నాయకులు పేర్కొన్నారు. కవిత ఎంపీగా ఉన్నప్పుడు బోధన్, బాన్సువాడలోని మంజీర నది ఇసుక దందాలో రూ.కోట్లు దండుకోలేదా వారు ప్రశ్నించారు. ప్రశాంత్రెడ్డిపై అసత్య ఆరోపణలు చేస్తే కవితకు ఇసుకు మామూళ్లు ఇచ్చిన వారి పేర్లు మొత్తం బయటపెడతామని వారు హెచ్చరించారు. హైదరాబాద్లో (Hyderabad) గుట్కా వ్యాపారుల వద్ద సైతం డబ్బులు వసూలు చేసిన చరిత్ర కవితదని వారు పేర్కొన్నారు.
పూటకో అవినీతి పని చేస్తున్న కాంగ్రెస్ సీఎం రేవంత్రెడ్డిని (CM Revanth Reddy) వదిలేసి ప్రశాంత్రెడ్డిపై ఆరోపణలు చేయడం సరికాదన్నారు. ప్రపంచంలోనే అతి పెద్దదైన లిఫ్ట్ ఇరిగేషన్ ప్రాజెక్ట్ కాళేశ్వరం కట్టి అక్కడి నీళ్లను నిజామాబాద్ జిల్లా (Nizamabad District) ఎస్సారెస్పీలోకి, కామారెడ్డి జిల్లా నిజాంసాగర్లోకి తీసుకొచ్చింది కేసీఆరే కదా అని వారన్నారు. అటువంటి కేసీఆర్ను ఆయన బిడ్డవై ఉండి కేసీఆర్ నీళ్లు తేలేదంటే ప్రశాంత్రెడ్డి ఎలా ఊరుకుంటాడని వారు ప్రశ్నించారు. సమావేశంలో డీసీసీబీ డైరెక్టర్ శేఖర్ రెడ్డి, పార్టీ భీమ్గల్, మోర్తాడ్, కమ్మర్పల్లి, వేల్పూర్, ముప్కాల్, ఏర్గట్ల మండలాల అధ్యక్షులు దొనకంటి నర్సయ్య, రేగుంట దేవేందర్, కల్లెడ ఏలియా, నాగాధర్ రెడ్డి, పూర్ణన్నాథం, నర్సారెడ్డి, మైలారం సుధాకర్, గంగారెడ్డి, రాజేశ్వర్, మొయిజ్ తదితరులు పాల్గొన్నారు.
