అక్షరటుడే, వెబ్డెస్క్ : Austria | ఆస్ట్రియాలోని అత్యంత ఎత్తైన గ్రాస్గ్లాక్నర్ పర్వతంపై 33 ఏళ్ల కెర్స్టిన్ గర్ట్నర్ దుర్మరణం పొందిన ఘటన తీవ్ర కలకలం రేపుతోంది. జనవరిలో జరిగిన ఈ ప్రమాదంలో తీవ్ర నిర్లక్ష్యం కారణమని అభియోగాలు రావడంతో ఆమె ప్రియుడు, అనుభవజ్ఞుడైన పర్వతారోహకుడు థామస్ ప్లాంబర్గర్ (Thomas Plumberger) (39)పై అధికారులు హత్య కేసు నమోదు చేశారు.
జనవరిలో కెర్స్టిన్, థామస్ ఇద్దరూ పర్వతారోహణ (Mountaineering)కు బయలుదేరగా, అనుకున్న సమయం కంటే రెండు గంటలు ఆలస్యంగా ప్రయాణం ప్రారంభించడంతో వారు తీవ్ర ప్రతికూల వాతావరణంలో చిక్కుకున్నారు. మైనస్ 20 డిగ్రీల చలి, పెనుగాలులు పరిస్థితిని మరింత క్లిష్టం చేశాయి. శిఖరానికి కేవలం 150 అడుగుల దూరంలో ఉండగా కెర్స్టిన్ తీవ్ర అలసటతో కుప్పకూలింది.
Austria | సహాయం కోసం వెళ్లి ఒంటరిగా వదిలేశాడా?
ప్రాసిక్యూటర్ల ప్రకారం—రాత్రి 2 గంటల సమయంలో థామస్ “సహాయం తీసుకొస్తున్నానని” చెప్పి కెర్స్టిన్ను ఆ ప్రాణాంతక పరిస్థితుల్లో ఒంటరిగా వదిలి వెళ్లాడు. అత్యవసర దుప్పట్లు, రక్షణ సామగ్రి ఉండి కూడా వాటిని ఆమెకు అందించలేదని అధికారులు అంటున్నారు.థామస్ మొదటి కాల్ చేసిన తర్వాత ఫోన్ను సైలెంట్లో ఉంచాడని, సహాయక బృందాలు చేరేందుకు కీలకమైన గంటలను వృథా చేశాడని ప్రాసిక్యూషన్ ఆరోపిస్తోంది. తీవ్ర గాలులు, రాత్రి పరిస్థితుల కారణంగా రెస్క్యూ టీమ్స్ (Rescue Teams) మరుసటి రోజు ఉదయం మాత్రమే అక్కడికి చేరుకున్నారు. అప్పటికే కెర్స్టిన్ మృతిచెందింది.
థామస్పై తీవ్ర నిర్లక్ష్యంతో హత్య చేసినట్లు కేసు నమోదైంది. నేరం రుజువైతే అతనికి గరిష్టంగా మూడు సంవత్సరాల జైలు శిక్ష పడే అవకాశం ఉంది. అయితే ఇది కేవలం దురదృష్టకరమైన ప్రమాదమని, తన క్లయింట్ను తప్పుపట్టడం అన్యాయమని థామస్ న్యాయవాది (Advocate) వాదిస్తున్నారు.ఈ కేసుకు సంబంధించి కీలక విచారణ 2026 ఫిబ్రవరి 19న జరగనుంది. అంతర్జాతీయ స్థాయిలో పెద్ద చర్చనీయాంశంగా మారిన ఈ ఘటనపై అందరి దృష్టి ఆత్మహత్యా నిర్లక్ష్యం లేదా నిజమైన ప్రమాదమా అన్న విషయంపై నిలిచింది. ఇప్పుడు ఈ ఘటన దేశ వ్యాప్తంగా చర్చనీయాంశం అయింది.
