అక్షరటుడే, వెబ్డెస్క్ : CPI Narayana | సీపీఐ సీనియర్ నాయకుడు నారాయణ సంచలన వ్యాఖ్యలు చేశారు. తెలుగు సినిమాలను పైరసీ చేసి ఐబొమ్మ వెబ్సైట్లో (iBomma Website) అప్లోడ్ చేస్తున్న ఇమ్మడి రవిని పోలీసులు ఇటీవల అరెస్ట్ చేసిన విషయం తెలిసిందే. దీనిపై నారాయణ స్పందించారు.
ఐబొమ్మ వెబ్సైట్లో ఎంతో మంది సినిమాలు చూసేవారు. తాను కూడా ఐబొమ్మలో సినిమాలు ఫ్రీగా చూశానని నారాయణ పేర్కొన్నారు. రూ.ఆరేడు వందలు పెట్టి ఎలా చూసేది అని ఐబొమ్మలో చూశానని చెప్పారు. కాగా చాలా మంది నాయకులు, అధికారులు సైతం ఐబొమ్మలో సినిమాలు చూసినట్లు ఆరోపణలు ఉన్నాయి. అయితే నారాయణ మాత్రం తాను చూశానని చెప్పడం గమనార్హం. అద్భుతమైన తెలివితేటలు ఉన్న రవి (Immad Ravi) అలా మారడానికి ఈ వ్యవస్థలే కారణమని ఆయన పేర్కొన్నారు. వ్యవస్థలో లోపాలను సరిచేయకుండా ఉంటే ఇలాంటి రవిలే పుట్టుకు వస్తారన్నారు.
CPI Narayana | వెయ్యి మంది హిడ్మాలు పుడతారు
ఆంధ్రప్రదేశ్లోని మారేడ్మిల్లి (Maredumilli) అటవీ ప్రాంతంలో ఇటీవల జరిగిన ఎన్కౌంటర్ మావోయిస్ట్ కీలక నేత హిడ్మా మృతి చెందిన విషయం తెలిసిందే. ఒక హిడ్మా చనిపోతే వెయ్యి మంది పుడతారని నారాయణ అన్నారు. అలాగే ఒక ఐబొమ్మ రవిని చంపితేనో, జైల్లో వేస్తేనో మరో 100 మంది వస్తారని వ్యాఖ్యానించారు.
CPI Narayana | వారిని ఉరితీయాలి
ఇమ్మడి రవిని ఉరి తీస్తే ఎలాంటి ప్రయోజనం ఉండదని చెప్పారు. సినిమా మాఫియాను ఉరితీస్తే సమాజానికి మేలు జరుగుతుందన్నారు. నిర్మాతలు రూ.కోట్లు ఖర్చు పెట్టి టికెట్ ధరల పెంపు కోసం ప్రభుత్వాలను అడుక్కుంటున్నారని విమర్శించారు. సామాన్య ప్రజలను దోచుకోవడానికి ప్రభుత్వాలు సైతం సాయం చేస్తున్నాయని ఆగ్రహం వ్యక్తం చేశారు. కాగా.. నారాయణ రెండు నెలల క్రితం సీపీఐ జాతీయ కార్యదర్శి పదవి నుంచి తప్పుకున్నారు. తనకు 75 ఏళ్లు నిండడంతో పార్టీ బాధ్యతల నుంచి తప్పుకుంటున్నట్లు తెలిపారు. ప్రస్తుతం పార్టీ కంట్రోల్ కమిషన్ ఛైర్మన్గా ఆయన కొనసాగుతున్నారు.
