అక్షరటుడే, వెబ్డెస్క్ : Under-19 World Cup | అండర్-19 ప్రపంచకప్లో ఐదుసార్లు ఛాంపియన్ అయిన భారత యువ జట్టు (Team India) మరోసారి తన సత్తాను చాటింది. జింబాబ్వేలోని బులవాయో వేదికగా గురువారం జరిగిన తమ తొలి మ్యాచ్లో అమెరికాపై డక్వర్త్–లూయిస్ పద్ధతిలో 6 వికెట్ల తేడాతో గెలిచి టోర్నీని విజయవంతంగా ఆరంభించింది.
ఈ మ్యాచ్లో భారత బౌలర్లు ప్రత్యర్థిని పూర్తిగా నియంత్రించగా, ముఖ్యంగా పేసర్ హెనిల్ పటేల్ అద్భుత ప్రదర్శనతో ఆకట్టుకున్నాడు. టాస్ గెలిచిన భారత్ ఫీల్డింగ్ ఎంచుకోవడం మ్యాచ్కు టర్నింగ్ పాయింట్గా మారింది. కెప్టెన్ వ్యూహాన్ని నిజం చేస్తూ హెనిల్ పటేల్ తన మొదటి స్పెల్లోనే అమెరికా టాప్ ఆర్డర్ను ఛిన్నాభిన్నం చేశాడు.
Under-19 World Cup | అమెరికా బ్యాటింగ్ను కూల్చేసిన భారత పేసర్లు
కేవలం 12 ఓవర్లలోనే యూఎస్ఏ 35 పరుగులకే 4 వికెట్లు కోల్పోయి తీవ్ర ఒత్తిడిలో పడింది. ఆ తర్వాత కూడా భారత బౌలర్లు క్రమం తప్పకుండా వికెట్లు పడగొట్టడంతో అమెరికా జట్టు 35.2 ఓవర్లలో 107 పరుగులకే ఆలౌట్ అయింది. హెనిల్ పటేల్ 16 పరుగులు మాత్రమే ఇచ్చి 5 వికెట్లు సాధించి ఈ టోర్నీలో తొలి ఐదు వికెట్ల ప్రదర్శన చేసిన బౌలర్గా నిలిచాడు. అతనికి మిగతా బౌలర్లు చక్కని సహకారం అందించడంతో అమెరికా (America) బ్యాటింగ్ ఎక్కడా పుంజుకోలేకపోయింది. 108 పరుగుల లక్ష్యంతో బ్యాటింగ్కు దిగిన భారత్కు ఆరంభంలోనే అనూహ్య పరిణామం ఎదురైంది. ఈ మ్యాచ్తోనే 14 ఏళ్ల 294 రోజుల్లో U19 ప్రపంచకప్లో ఆడిన అతి పిన్న వయస్కుడిగా రికార్డు సృష్టించిన వైభవ్ సూర్యవంశీ (Vaibhav Suryavanshi) త్వరగానే ఔటయ్యాడు. అనంతరం వర్షం, మెరుపుల కారణంగా ఆటకు అంతరాయం కలగడంతో డక్వర్త్–లూయిస్ పద్ధతిలో భారత్ లక్ష్యాన్ని 37 ఓవర్లలో 96 పరుగులుగా సవరించారు.
వర్షం తర్వాత ఆట ప్రారంభమైనప్పటికీ భారత్ 25 పరుగులకే 3 వికెట్లు కోల్పోయి ఒత్తిడిలో పడింది. ఈ సమయంలో అభిగ్యాన్ కుందు (Abhigyan Kundu) (42 నాటౌట్) బాధ్యతాయుత ఇన్నింగ్స్ ఆడి జట్టును నిలబెట్టాడు. అతనికి విహాన్ మల్హోత్రా మంచి సహకారం అందించడంతో భారత్ లక్ష్యాన్ని చేధించి విజయాన్ని అందుకుంది. ఈ విజయంతో భారత యువజట్టు ఆత్మవిశ్వాసం పెంచుకుంది. బౌలింగ్లో ఆధిపత్యం, క్లిష్ట పరిస్థితుల్లో బ్యాటింగ్ నిలకడ చూపించగలగడం జట్టుకు ప్రధాన బలాలుగా కనిపించాయి. భారత్ తన తదుపరి మ్యాచ్లో శనివారం బంగ్లాదేశ్తో తలపడనుండగా, ఈ మ్యాచ్లోనూ అదే జోరు కొనసాగించాలని జట్టు ఆశిస్తోంది.
