అక్షరటుడే, కామారెడ్డి: panchayat elections | గ్రామ పంచాయతీ రెండో విడత నామినేషన్ల స్వీకరణ కోసం అవసరమైన అన్ని ఏర్పాట్లు పూర్తి చేసినట్లు కలెక్టర్ ఆశిష్ సంగ్వాన్ తెలిపారు. ఇప్పటికే మొదటి విడతలో కామారెడ్డి డివిజన్లోని పది మండలాల్లో నామినేషన్ల స్వీకరణ ప్రక్రియను శనివారం సాయంత్రం వరకు పూర్తి చేయడం జరిగిందన్నారు. ఈ నెల 30 నుంచి డిసెంబర్ 2వ తేదీ వరకు రెండో విడతగా నామినేషన్ల స్వీకరణ కొనసాగుతుందన్నారు.
ఎల్లారెడ్డి డివిజన్లోని ఎల్లారెడ్డి, నాగిరెడ్డిపేట్, గాంధారి, లింగంపేట్, బాన్సువాడ డివిజన్లోని పిట్లం, నిజాంసాగర్, మహమ్మద్ నగర్ మండలాలు ఏడు మండలాల పరిధిలోని 197 సర్పంచ్ స్థానాలకు, 1654 వార్డు స్థానాలకు నామినేషన్లు స్వీకరించడం జరుగుతుందన్నారు. ఉదయం 10.30 గంటల నుంచి సాయంత్రం 5.00 గంటల వరకు నామినేషన్ల స్వీకరణ కేంద్రాల్లో నామపత్రాలు దాఖలు చేయవచ్చని తెలిపారు. అన్ని కేంద్రాలలో హెల్ప్ డెస్క్లు అందుబాటులో ఉంచామన్నారు. రెండో విడత నామినేషన్ల స్వీకరణ ప్రక్రియపై సంబంధిత అధికారులతో టెలికాన్ఫరెన్స్ నిర్వహించి పలు అంశాలపై సూచనలు చేశారు. ఎలాంటి తప్పిదాలకు తావులేకుండా పకడ్బందీగా నిర్వహించేందుకు అధికారులు చర్యలు తీసుకోవాలని ఆదేశించారు.
