అక్షరటుడే, వెబ్డెస్క్ : Weather Updates | తెలంగాణలో మంగళవారం భారీ వర్షాలు (Heavy Rains) కురిసే అవకాశం ఉందని వాతావరణ శాఖ (IMD) అధికారులు హెచ్చరించారు. ప్రస్తుతం వరి కోతల నేపథ్యంలో రైతులు జాగ్రత్తలు పాటించాలని సూచించారు.
రాష్ట్రంలో గత వారం రోజులుగా వరుణుడు కాస్త శాంతించాడు. కొన్ని జిల్లాల్లో అడపాదడప వర్షాలు కురిసినా మిగతా ప్రాంతాల్లో వాతావరణం పొడిగా ఉంది. దీంతో నాలుగైదు రోజులుగా రాష్ట్ర వ్యాప్తంగా వరికోతలు ఊపందుకున్నాయి. వానలు లేకపోవడంతో రైతులు పొలాలు కోసి వడ్లు ఆరబోస్తున్నారు. ఈ క్రమంలో నేటి నుంచి మళ్లీ వర్షాలు ఉంటాయని వాతావరణ శాఖ అధికారులు హెచ్చరించారు. దీంతో రైతులు (Farmers) ఆందోళన చెందుతున్నారు. ఉదయం నుంచి ఆకాశం మేఘావృతమై ఉండటంతో వడ్ల కుప్పల దగ్గరే కాపలా ఉన్నారు.
Weather Updates | ఆ జిల్లాలకు అలెర్ట్..
రాష్ట్రంలోని పలు ప్రాంతాల్లో సోమవారం సైతం వర్షం పడింది. మంగళవారం సైతం నల్గొండ, సూర్యాపేట, యాదాద్రి భువనగిరి, ఖమ్మం, మహబూబాబాద్, రంగారెడ్డి, మహబూబ్నగర్, వికారాబాద్, నాగర్ కర్నూల్, వనపర్తి, కొత్తగూడెం, ములుగు, జనగామ, మెదక్, సంగారెడ్డి, సిద్దిపేట జిల్లాల్లో భారీ వర్షాలు కురిసే అవకాశం ఉంది. హైదరాబాద్ నగరంలో సైతం వర్షాలు పడే ఛాన్స్ ఉంది. అయితే మధ్యాహ్నం వరకు వాతావరణం పొడిగా ఉంటుంది. మధ్యాహ్నం నుంచి రాత్రి వరకు అక్కడక్కడ భారీ వర్షాలు కురుస్తాయి.
