అక్షరటుడే, వెబ్డెస్క్ : IPL 2025 | ఆరంభంలో ఇబ్బంది పడడం.. మధ్యలో పుంజుకోవడం.. చివర్లో చెలరేగి ఆడడం.. ఐపీఎల్లో ముంబై ఇండియన్స్ శైలి. ఆటలోనే కాదు టైటిల్స్ నెగ్గడంలోనూ ముంబై తీరు ఇదే. తొలి ఐదు సీజన్లలో ఒకసారి మాత్రమే ఫైనల్ వరకూ వచ్చిన ముంబై ఇండియన్స్.. తర్వాతి 8 సీజన్లలో ఏకంగా ఐదు టైటిల్స్ నెగ్గింది. తర్వాతి నాలుగేళ్లలో ఒక్క టైటిల్ గెలవలేకపోయిన ముంబై.. ఇప్పుడు ఆరో టైటిలే లక్ష్యంగా దూసుకెళ్తోంది.
తాజా సీజన్లోనూ తొలి ఐదు మ్యాచ్ల్లో ఒకటే విజయం సాధించిన ముంబై ఇండియన్స్.. తర్వాతి నాలుగు మ్యాచ్లకు నాలుగు గెలిచి అందర్నీ ఆశ్చర్యపరిచింది. ఇప్పటి వరకు 9 మ్యాచ్లు ఆడిన ముంబై ఇండియన్స్ మొత్తం 5 విజయాలతో పాటు 0.673 రన్రేట్తో పాయింట్స్ టేబుల్లో మూడో స్థానంలో నిలిచింది. ఈ టోర్నీలో ముంబై ఇంకా 5 మ్యాచ్లు ఆడాల్సి ఉంది. ఈ ఐదింటిలో మూడు విజయాలు సాధిస్తే ముంబై ఇండియన్స్ ప్లే ఆఫ్స్ బెర్త్ ఖాయం కానుంది.
రోహిత్ శర్మ ఫామ్లోకి రావడం.. బౌలర్లు లయ అందుకోవడంతో ముంబై ఆధిపత్యం కొనసాగిస్తోంది. గత నాలుగు మ్యాచ్ల్లో ముంబై ఏకపక్ష విజయాలను అందుకుంది. ఐపీఎల్లో ఐదేళ్ల తర్వాత వరుసగా నాలుగు విజయాలు నమోదు చేసింది. ఐపీఎల్ 2020 సీజన్లో ముంబై ఇలానే ఆరంభంలో చతికిలపడి ఆ తర్వాత వరుస విజయాలతో ప్లే ఆఫ్స్ దూసుకొచ్చి టైటిల్ ఎగరేసుకుపోయింది. తాజా సీజన్లోనూ ఆ పరిస్థితులే రిపీట్ కావడంతో ఈ సారి కూడా ముంబై టైటిల్ గెలుస్తుందని ఫ్యాన్స్ కామెంట్ చేస్తున్నారు. సైలెంట్ విన్నర్ దూసుకొస్తుందని ప్రత్యర్థులను హెచ్చరిస్తున్నారు.
