అక్షరటుడే, వెబ్​డెస్క్ : Balochistan | బలూచిస్తాన్​ (Balochistan) ప్రజలపై పాక్​ మరో నిర్బంధ చట్టాన్ని ప్రయోగించేందుకు సిద్ధమైంది.

తమ వనరులను దోచుకుంటోందని ఆరోపిస్తూ బలూచిస్తాన్​ ప్రజలు ప్రత్యేక దేశం డిమాండ్​ చేస్తున్నారు. ఈ మేరకు బలూచ్​ లిబరేషన్​ ఆర్మీ (BLA) అనే వేర్పాటువాద సంస్థ పాక్​ సైనికులే లక్ష్యంగా దాడులకు పాల్పడుతోంది. ఈ దాడుల్లో వందలాది మంది పాక్​ సైనికులు మృతి చెందారు.

దీంతో బలూచిస్తాన్‌ వేర్పాటువాద ఉద్యమాన్ని అణచివేసేందుకు పాక్‌ ప్రభుత్వం అనేక చర్యలు చేపట్టింది. తాజాగా ఓ వివాదాస్పద చట్టాన్ని కూడా తీసుకొచ్చింది. ఉగ్రవాద వ్యతిరేక చట్టం 2025కు​ అసెంబ్లీ ఆమోదం తెలిపింది. దీని ప్రకారం ఎటువంటి ఆరోపణలు, కేసులు లేకున్నా అనుమానిత వ్యక్తులను అదుపులోకి తీసుకొని కోర్టులో హాజరుపరచకుండానే 90 రోజుల వరకు నిర్బంధించే అధికారం పాక్‌ సైన్యం, నిఘా సంస్థలకు ఉంటుంది.

దీంతో ఈ చట్టంపై ప్రజలు ఆందోళన చెందుతున్నారు. ఇప్పటికే పాకిస్తాన్​ సైన్యం బలూచ్​ ప్రజలను అక్రమంగా నిర్బంధిస్తోందని వారు వాపోయారు. ఇప్పడు దానిని చట్టం చేసిందని ఆవేదన వ్యక్తం చేస్తున్నారు. ఈ చట్టంపై పౌర హక్కుల సంఘాలు సైతం మండిపడుతున్నాయి.