అక్షరటుడే, వెబ్డెస్క్ : Indiramma Sarees | రాష్ట్రంలోని మహిళలకు రాష్ట్ర ప్రభుత్వం గుడ్న్యూస్ చెప్పింది. మాజీ ప్రధాని ఇందిరా గాంధీ (Indira Gandhi) జయంతి సందర్భంగా ఈ నెల 19న మహిళా సంఘాల సభ్యులకు రెండు చీరలు పంపిణీ చేయనుంది.
రాష్ట్రంలో బీఆర్ఎస్ హయాంలో మహిళలకు బతుకమ్మ చీరలు పంపిణీ చేసేవారు. రేషన్ కార్డుల్లో పేరున్న ప్రతి మహిళకు ఒక చీర అందించే వారు. అయితే కాంగ్రెస్ అధికారంలోకి వచ్చాక బతుకమ్మ చీరల (Bathukamma sarees) పంపిణీ నిలిపి వేసింది. గత ఏడాది చీరలు ఇవ్వలేదు. అయితే ఈ ఏడాది బతుకమ్మ పండుగకు మహిళా సంఘ సభ్యులకు రెండు చొప్పున చీరలు పంపిణీ చేస్తామని ప్రభుత్వం చెప్పింది.అయితే సకాలంలో చీరలు సిద్ధం కాకపోవడంతో పంపిణీని వాయిదా వేసింది.
Indiramma Sarees | ఇందిరా గాంధీ జయంతి రోజు
ఇందిరా గాంధీ జయంతి (Indira Gandhi Jayanti) సందర్భంగా ఈ నెల 19న చీరలు పంపిణీ చేయాలని ప్రభుత్వం యోచిస్తోంది. 65 లక్షల మంది మహిళకు చీరలు పంపిణీ చేయనుంది. ఇప్పటికే చీరల తయారు దాదాపుగా పూర్తయినట్లు సమాచారం. వారం రోజుల్లో మొత్తం చీరల ఉత్పత్తి పూర్తవుతందని అధికారులు తెలిపారు. బీఆర్ఎస్ హయాంలో బతుకమ్మ చీరలకు రూ.350 చొప్పున చెల్లించారు. అయితే వాటి నాణ్యతపై విమర్శలు వచ్చాయి. ఈ క్రమంలో కాంగ్రెస్ ప్రభుత్వం ఇందిరా మహిళా శక్తి చీరకు రూ. 480గా ధర నిర్ణయించింది. కాగా ఇప్పటికే పలు ప్రాంతాల్లో పంపిణీకి చీరలు సిద్ధంగా ఉన్నట్లు తెలిసింది. కాగా చీరల తయారీతో నేత కార్మికులకు ఉపాధి లభించింది.
