అక్షరటుడే, వెబ్డెస్క్: One Crore Salary | ప్రస్తుతం చాలా మంది యువత చిన్న చిన్న విషయాలకే ఆత్మ స్థైర్యం కోల్పోతున్నారు. మార్కులు (Marks) సరిగ్గా రాలేవని, పరీక్షల్లో ఫెయిల్ అయ్యామని ఆత్మహత్యలకు పాల్పడుతున్నారు. ఉద్యోగాలు (Jobs) రాకపోవడంతో ఎంతో మంది ఇబ్బందులు పడుతున్నారు.
తాము వెళ్లే మార్గంలో ఒకటి రెండు అవాంతరాలు ఎదురు కాగానే వెనుతిరుగుతున్నారు. తమతో కాదని కాడి కింద పడేస్తున్నారు. కానీ ఈ యువకుడు మాత్రం పట్టు వదలని విక్రమార్కుడిలా ప్రయత్నించారు. ఏకంగా 300 సార్లు తిరస్కరణకు గురైనా.. అనుకున్నది సాధించాడు. ఏకంగా రూ.కోటి వేతనంతో ఉద్యోగం సాధించాడు.
బెంగళూరుకు (Bangalore) చెందిన ఓ యువకుడు ఇంజినీరింగ్ (Engineering) పూర్తి చేశాడు. కంప్యూటర్ సైన్స్ చదవాలని అనుకున్నా సీటు రాకపోవడంతో అతను ఎలక్ట్రికల్ ఇంజినీరింగ్ చదివాడు. మొదటి నుంచి మనోడు చదువులో అంత చురుకేమి కాదు. బ్యాక్లాగ్లు కూడా ఉండేవి. అయితే మనోడికి బీటెక్ పూర్తయ్యే సరికి ఫైనాన్స్ సబ్జెక్టుపై ఆసక్తి ఏర్పడింది. దీంతో స్టాక్ మార్కెట్పై పట్టు పెంచుకున్నాడు. గ్లోబల్ స్టాక్ మార్కెట్ల (Stock Markets) పనితీరుపై అనేక విషయాలు నేర్చుకున్నాడు.
One Crore Salary | జాబ్ వచ్చినా..
బీటెక్ పూర్తయిన తర్వాత ఆ యువకుడిని క్యాంపస్ ప్లేస్మెంట్లో జాబ్ వచ్చింది. రూ.7.5 లక్షల ప్యాకేజీతో కొలువు వచ్చింది. కానీ మనోడికి మార్కెట్లపై మనసు పడడంతో దానిని తిరస్కరించాడు. ఫైనాన్షియల్ రంగంలోనే కెరియర్ ప్రారంభించాలని కలలు కన్నాడు. ఇంటర్న్షిప్, ఉద్యోగాల కోసం ఎన్నో దరఖాస్తులు చేశాడు. ఏకంగా 300 సార్లు మనోడిని ఆయా కంపెనీలు రిజెక్ట్ చేశాయి.
దీంతో ఫైనాన్షియల్ మోడలింగ్, కంపెనీ వాల్యూయేషన్ లాంటి కోర్సులు కూడా చేశాడు. ఎట్టకేలకు ఆ యువకుడికి క్వాంట్ రీసెర్చ్ (Quant Research) అనే కంపెనీలో ఇంటర్న్షిప్ చేయడానికి అవకాశం వచ్చింది. అప్పటికే మంచి ఆకలితో ఉన్న యువకుడు ఏడాదిలో షేర్ మార్కెట్ గురించి అనేక విషయాలు తెలుసుకున్నాడు. దీంతో లండన్కు చెందిన ఒక ట్రేడింగ్ ఫర్మ్ రూ.1.03 కోట్ల వేతనంతో అతడిని ఉద్యోగంలోకి తీసుకుంది.
One Crore Salary | అనుకున్నది సాధించాడు
ఆ యువకుడు బీటెక్ చేసిన తనకు నచ్చిన రంగంలో కొలువు సాధించడానికి ఎంతో కష్టపడ్డాడు. ఎక్కడా కూడా వెనక్కి తగ్గకుండా.. కొత్త అంశాలు నేర్చుకుంటూ ఉన్నాడు. తనకు వచ్చిన అవకాశాన్ని సద్వినియోగం చేసుకున్నాడు. 300 సార్లు అప్లికేషన్లు రిజెక్ట్ అయినా మొక్కవోని సంకల్పంతో ప్రయత్నించాడు. దీంతో ఆయన శ్రమకు ఫలితం తగ్గింది. రూ. కోటి వేతనంతో జాబ్ దొరికింది. బెంగళూరుకు చెందిన ఆ యువకుడు పేరు చెప్పకుండా తన సక్సెస్ స్టోరీ పంచుకున్నాడు. యువత చిన్న చిన్న కారణాలకు నిరాశ చెందకుండా ప్రయత్నిస్తే ఇలా విజయాలు వరిస్తాయని పలువురు అంటున్నారు.
