అక్షరటుడే, వెబ్డెస్క్ : Tirupati | మానవ సంబంధాలు రోజు రోజుకు దారుణంగా మారుతున్నాయి. తాజాగా ఓ మహిళ తన కూతురి ఎదుటే అల్లుడిని పెళ్లి చేసుకోవాలని చూసింది. అంతేగాకుండా అడ్డుకున్న కూతురిపై దాడి చేసింది.
ప్రస్తుతం చాలా మంది ప్రేమ, వివాహేతర సంబంధాల మోజులో పడి జీవితాలను నాశనం చేసుకుంటున్నారు. వావి వరుసలు మరిచి పోతున్నారు. ఆంధ్రప్రదేశ్ (AP)లోని తిరుపతి కేవీబీ పురంలో ఇలాంటి ఘటన చోటు చేసుకుంది. గ్రామానికి చెందిన 15 ఏళ్ల బాలిక, 18 ఏళ్ల బాలుడు ఐదు నెలల క్రితం ప్రేమ పెళ్లి (Love Marriage) చేసుకున్నారు. బాలిక తల్లితో కలిసి ఆ దంపతులు జీవిస్తున్నారు.
Tirupati | అల్లుడితో వివాహేతర సంబంధం
ముగ్గురు ఒకే ఇంట్లో ఉంటుండటంతో సదరు మహిళకు అల్లుడితో వివాహేతర సంబంధం ఏర్పడింది. ఈ క్రమంలో ఆమె అల్లుడిని పెళ్లి చేసుకోవాలని నిర్ణయించుకుంది. కూతురి ఎదుటే అల్లుడితో తాళి కట్టించుకోవాలని చూసింది. అయితే ఆ బాలిక వారిని అడ్డుకుంది. దీంతో ఇద్దరు కలిసి బాలికపై రోకలి బండతో దాడి చేశారు. దీంతో ఆమె కేకలు వేయడంతో స్థానికులు వచ్చి కాపాడారు. అనంతరం అత్త, అల్లుడికి దేహశుద్ధి చేసి పోలీసులకు అప్పగించారు.
కాగా ఓ బాలిక 15 ఏళ్లకే ప్రేమ, పెళ్లి చేసుకోవడం ప్రస్తుత పరిస్థితులకు అద్దం పడుతోంది. సినిమాలు, స్మార్ట్ ఫోన్, ఓటీటీల ప్రభావంతో నేటి పిల్లలు చెడిపోతున్నారు. చిన్నతనంలోనే ప్రేమ, పెళ్లి అంటూ జీవితాలను నాశనం చేసుకుంటున్నారు. మరోవైపు ఓ తల్లి ఏకంగా అల్లుడితో అక్రమ సంబంధం పెట్టుకొని కూతురిపై దాడి చేయడంపై ప్రజలు మండిపడుతున్నారు. ఇలాంటి మహిళలను కఠినంగా శిక్షించాలని డిమాండ్ చేస్తున్నారు.
