అక్షరటుడే, వెబ్డెస్క్: Parliament sessions | బీహార్ ఎన్నికల్లో ఘన విజయం సాధించిన ఎన్డీఏ కూటమి జోష్ మీదుంది. మరో వైపు ఘోర పరాజయంతో నైరాశ్యంలో కూరుకుపోయిన ఇండియా కూటమి.. ఇప్పుడిప్పుడే కోలుకునే ప్రయత్నంలో ఉంది. ఈ నేపథ్యంలో సోమవారం (డిసెంబర్ 2) నుంచి ప్రారంభమవుతున్న పార్లమెంటు శీతాకాల సమావేశాలు (Parliament sessions) డిసెంబర్ 19 వరకు సాగనున్నాయి. మొత్తం 15 రోజుల పాటు జరిగే ఈ సమావేశాల్లో కేంద్ర ప్రభుత్వం కీలక రంగాల్లో సంస్కరణల బిల్లులను ప్రవేశపెట్టేందుకు సన్నాహాలు చేస్తోంది.
ముఖ్యంగా అణువిద్యుత్తు రంగం, సెక్యూరిటీస్ మార్కెట్ నియమ నిబంధనలు, ఉన్నత విద్యా వ్యవస్థ పునర్వ్యవస్థీకరణ, బీమా రంగ సవరణలు, కార్పొరేట్ చట్టాలు, ఇంకా జాతీయ రహదారులు, మధ్యవర్తిత్వ-రాజీ చట్టాల్లో మార్పులకు సంబంధించిన బిల్లులు ప్రధానంగా ఉంటాయి. అయితే ఇందులో ప్రధానమైన ‘సర్’ రెండో విడత అమలుపై తీవ్ర చర్చ జరిగే అవకాశం ఉంది.
Parliament sessions | ‘సర్’ రెండో విడతపై తీవ్ర చర్చ
ప్రత్యేక తీవ్ర సమీకృత ఓటరు జాబితా సవరణ (సర్) (SIR) కార్యక్రమంపై ప్రతిపక్షాలు దృష్టి కేంద్రీకరించనున్నాయి. తొమ్మిది రాష్ట్రాలు, కొన్ని కేంద్రపాలిత ప్రాంతాల్లోని 321 జిల్లాల్లోని 1,843 అసెంబ్లీ నియోజకవర్గాల్లో జరుగుతున్న రెండో దశ సర్ కసరత్తుపై పెద్ద ఎత్తున ప్రశ్నలు లేవనెత్తే అవకాశం ఉంది. ముఖ్యంగా ప్రతిపక్షాలు అధికారంలో ఉన్న కేరళ, పశ్చిమ బెంగాల్, తమిళనాడు రాష్ట్రాల్లో ఎన్నికలు సమీపిస్తున్న నేపథ్యంలో ఈ అంశాన్ని రాజకీయంగా ఆయుధంగా మలిచే ప్రయత్నం చేయవచ్చని కనిపిస్తోంది.
- ఇక అణు విద్యుత్తు ఉత్పత్తి రంగంలో ప్రైవేటు, ప్రభుత్వేతర సంస్థలకు అవకాశం కల్పించే అణు ఇంధన బిల్లు కూడా పెద్ద చర్చకు తెరలేపనుంది. అత్యంత సున్నితమైన ఈ రంగంలో ప్రైవేటు రంగ ప్రవేశం దేశ భద్రతకు, పర్యావరణానికి ముప్పుగా మారుతుందన్న ఆందోళన సాధారణ ప్రజల్లోనే కాకుండా ప్రతిపక్షాల్లోనూ బలంగా ఉంది.
- ఉన్నత విద్యా రంగంలో భారీ మార్పుగా చెప్పుకుంటున్న ‘ఉన్నత విద్యా కమిషన్ ఆఫ్ ఇండియా’ బిల్లు కూడా వివాదాస్పదమవుతుందన్న సూచనలు కనిపిస్తున్నాయి.
- అంతేకాకుండా, ఇటీవల అమలులోకి వచ్చిన నాలుగు కార్మిక కోడ్‌లను దేశవ్యాప్తంగా కార్మిక సంఘాలు వ్యతిరేకిస్తున్న నేపథ్యంలో ప్రతిపక్షాలు ఆ అంశాన్ని కూడా పార్లమెంటులో లేవనెత్తే అవకాశం ఉంది.
