MLA Defection | ఫిరాయింపు ఎమ్మెల్యేలపై వేటు పడేనా.. 6 నుంచి స్పీకర్​ విచారణ

13

అక్షరటుడే, వెబ్​డెస్క్ : MLA Defection | ఫిరాయింపు ఎమ్మెల్యేల వ్యవహారం ఎటూ తేలడం లేదు. స్పీకర్​ కార్యాలయం (Speaker Office) విచారణ ప్రక్రియలో జాప్యం చేస్తుండమే ఇందుకు కారణమని బీఆర్​ఎస్​ ఆరోపిస్తోంది. ఈ నెల 6 నుంచి రెండో విచారణ చేపట్టనున్నట్లు స్పీకర్​ గడ్డం ప్రసాద్​ కుమార్​ (Speaker Gaddam Prasad Kumar) తెలిపారు.

కాంగ్రెస్​ అధికారంలోకి వచ్చిన తర్వాత పది మంది బీఆర్​ఎస్​ ఎమ్మెల్యే పార్టీ (BRS MLA Party) ఫిరాయించిన విషయం తెలిసిందే. వారిపై అనర్హత వేటు వేయాలని బీఆర్​ఎస్​ నాయకులు స్పీకర్​కు ఫిర్యాదు చేశారు. అయితే ఆయన స్పందించకపోవడంతో.. సుప్రీంకోర్టును ఆశ్రయించారు. అనర్హతపై మూడు నెలల్లో నిర్ణయం తీసుకోవాలని సుప్రీంకోర్టు స్పీకర్​కు సూచించింది.

MLA Defection | గడువు ముగిసినా..

సుప్రీంకోర్టు ఆదేశాల మేరకు స్పీకర్​ ఫిరాయింపులకు పాల్పడిన ఎమ్మెల్యేలను విచారించారు. వారిపై ఫిర్యాదు చేసిన బీఆర్​ఎస్​ ఎమ్మెల్యేలు, ఫిరాయించిన ఎమ్మెల్యేలను క్రాస్​ ఎగ్జామినేషన్​ చేశారు. అయితే నలుగురు ఎమ్మెల్యేల విచారణ మాత్రమే పూర్తయింది. అక్టోబర్​ 31తో సుప్రీంకోర్టు (Supreme Court) ఇచ్చిన గడువు ముగిసింది. అందరి విచారణ పూర్తికాకపోవడంతో మరో రెండు నెలలు గడువు కావాలని ఇటీవల స్పీకర్​ సుప్రీంకోర్టులో పిటిషన్ వేశారు. తాజాగా నెల 6 నుంచి ఎమ్మెల్యేల అనర్హత పిటిషన్లపై రెండో విడత విచారణ చేపడుతున్నట్లు ఆయన తెలిపారు.

నవంబర్ 6న తెల్లం వెంకట్రావ్, సంజయ్​ల పిటిషన్లను స్పీకర్​ విచారించనున్నారు. 7న పోచారం శ్రీనివాస్ రెడ్డి, అరికెపూడి గాంధీల పిటిషన్లపై క్రాస్​ ఎగ్జామినేషన్​ చేపట్టనున్నారు. 12, 13వ తేదీల్లో రెండోసారి వారి పిటిషన్లను ఆయన విచారిస్తారు. అయితే విచారణ ప్రక్రియ ఇప్పట్లో ముగిసేలా కనిపించడం లేదు. నలుగురు ఎమ్మెల్యేల విచారణ పూర్తవగా.. మరో నలుగురికి సంబంధించి తాజాగా షెడ్యూల్​ వెలువడింది. ఇంకా ఇద్దరు ఎమ్మెల్యేల గురించి ఎలాంటి సమాచారం లేదు. దీంతో అసలు స్పీకర్​ వారిపై ఎదైనా నిర్ణయం తీసుకుంటారా.. లేదా అనే ఉత్కంఠ నెలకొంది.