అక్షరటుడే, వెబ్డెస్క్ : GHMC Zonal Offices | రాష్ట్ర ప్రభుత్వం ఇటీవల జీహెచ్ఎంసీ (GHMC) పరిధి పెంచిన విషయం తెలిసిందే. 27 మున్సిపాలిటీలను విలీనం చేయడంతో హైదరాబాద్ మెగా సిటీగా అవతరించింది.
జీహెచ్ఎంసీ పరిధి 650 చదరపు కిలోమీటర్ల నుంచి 2,053 చదరపు కిలోమీటర్లకు పెరిగింది. దీంతో పరిపాలనా సౌలభ్యం కోసం రాష్ట్ర ప్రభుత్వం జీహెచ్ఎంసీ వార్డుల (GHMC Wards) సంఖ్యను 150 నుంచి 300కి, జోన్ల సంఖ్యను ఆరు నుంచి 12కి పెంచింది. అలాగే సర్కిళ్ల సంఖ్యను 30 నుంచి 60కి విస్తరించింది. అదనపు జోనల్, సర్కిల్ కార్యాలయాల ఏర్పాటుతో ప్రజలకు సేవలను వేగంగా, సులభంగా అందించడంతో పాటు, నగరం అంతటా అభివృద్ధి పనులు వేగవంతమవుతాయని కమిషనర్ ఆర్వీ కర్ణన్ (Commissioner RV Karnan) అన్నారు.
GHMC Zonal Offices | కార్యాలయాలు ఇక్కడే..
జీహెచ్ఎంసీ పరిధిలో మొత్తం 12 జోనల్ కార్యాలయాలు అధికారులు ఏర్పాటు చేయనున్నారు. వాటి వివరాలను తాజాగా వెల్లడించారు. శేరిలింగంపల్లి, కూకట్పల్లి, కుత్బుల్లాపూర్, చార్మినార్, మల్కాజ్గిరి, ఉప్పల్, ఎల్బీ నగర్, శంషాబాద్, సికింద్రాబాద్, గొల్కొండ, ఖైరతాబాద్, రాజేంద్ర నగర్లో జోనల్ ఆఫీసులు ఉంటాయి. వీటి పరిధిలో 60 సర్కిల్ ఆఫీసులు ఉంటాయి.
గతంలో ఉన్న జోనల్ ఆఫీసులు యథావిధిగా కొనసాగుతున్నాయి. ఉప్పల్ జోనల్ ఆఫీస్ మున్సిపల్ కార్యాలయంలో ఏర్పాటు చేశారు. గతంలో కుత్బుల్లాపూర్ మున్సిపల్ కార్యాలయంగా కొనసాగిన భవనంలో ప్రస్తుతం జోనల్ ఆఫీస్ ఏర్పాటు చేశారు. మల్కాజిగిరి, శంషాబాద్, రాజేంద్ర నగర్ మున్సిపల్ ఆఫీసుల్లో, గోల్కొండ జోనల్ ఆఫీస్ అబిడ్స్లోని మున్సిపల్ పార్కింగ్ కాంప్లెక్స్లో ఏర్పాటు చేస్తూ అధికారులు ఆదేశాలు జారీ చేశారు.
