అక్షరటుడే, వెబ్డెస్క్: Water Chestnut | చలికాలం మార్కెట్లో నల్లగా, వింత ఆకారంలో కనిపించే దుంపలే ‘సింగాడా’. పైన నల్లని బొగ్గులా కనిపించినా, లోపల మాత్రం తెల్లటి వెన్నలా ఉండి క్రంచీ రుచితో ఇవి మనల్ని ఆకట్టుకుంటాయి. కేవలం రుచికే కాదు, పోషకాల విషయంలోనూ సింగాడా ఒక సూపర్ ఫుడ్.
ఉపవాసాల్లోనూ, పూజల్లోనూ పిండి రూపంలో వాడే ఈ దుంపలు.. చలికాలంలో వచ్చే ఎన్నో అనారోగ్య సమస్యలకు సహజ సిద్ధమైన మందులా పనిచేస్తాయి. అసలు ఈ చిన్న దుంపలో దాగున్న ఆ అపారమైన ప్రయోజనాలేంటో ఇప్పుడు తెలుసుకుందాం.
Water Chestnut | సింగాడా ప్రయోజనాలు :
ఎలా తినవచ్చు ? : సింగాడాలను పచ్చిగా తింటే క్రంచీగా, తీపి-వగరు కలిసిన రుచిలో ఉంటాయి. వీటిని ఉడికించి లేదా కాల్చుకుని కూడా తినవచ్చు. సలాడ్లు, సూపుల్లో వేసుకోవచ్చు. వీటి పిండితో లడ్డూలు, రొట్టెలు చేసుకోవడం మన దగ్గర చాలా ప్రసిద్ధి. ముఖ్యంగా ఉపవాసాల సమయంలో ఇది శరీరానికి తక్షణ శక్తిని ఇస్తుంది.
జీర్ణక్రియ: సింగాడాలో ఫైబర్ (పీచు పదార్థం) చాలా ఎక్కువగా ఉంటుంది. ఇది జీర్ణక్రియను మెరుగుపరుస్తుంది. చలికాలంలో చాలా మందిని ఇబ్బంది పెట్టే మలబద్ధకం సమస్యకు ఇది చెక్ పెడుతుంది.
ఎముకలు, గుండెకు రక్షణ: ఇందులో కాల్షియం, పొటాషియం, మెగ్నీషియం, జింక్ వంటి ఖనిజాలు పుష్కలంగా ఉన్నాయి. ఇవి ఎముకలను, దంతాలను దృఢంగా మారుస్తాయి. రక్తపోటును అదుపులో ఉంచి, గుండె ఆరోగ్యంగా ఉండేలా చూస్తాయి. అంతేకాదు, ఇది మెదడు పనితీరును మెరుగుపరిచి చురుకుదనాన్ని ఇస్తుంది.
చర్మం, జుట్టు సౌందర్యం: సింగాడాలో ఉండే ‘లారిక్ యాసిడ్’ చర్మం పొడి బారకుండా తేమను అందిస్తుంది. జుట్టు ఒత్తుగా పెరగడానికి తోడ్పడుతుంది. చుండ్రు సమస్యను తగ్గించడమే కాకుండా, శరీరంలోని విషతుల్యాలను (టాక్సిన్స్) బయటకు పంపి కాలేయాన్ని శుభ్రపరుస్తుంది.
షుగర్ ఉన్నవారికి వరం: ఇందులో విటమిన్ B, C, E, K లతో పాటు యాంటీ ఆక్సిడెంట్లు మెండుగా ఉంటాయి. ముఖ్యంగా ఇందులో కొవ్వులు, క్యాలరీలు చాలా తక్కువ. దీని గ్లైసెమిక్ ఇండెక్స్ తక్కువగా ఉండటం వల్ల మధుమేహం (Diabetes) ఉన్నవారు నిర్భయంగా దీనిని ఆహారంలో భాగం చేసుకోవచ్చు.
