API Sales: ప్రముఖ ఫార్మా దిగ్గజం వాన్బరీ లిమిటెడ్ (Wanbury Ltd) ప్రస్తుత ఆర్థిక సంవత్సరం మూడవ త్రైమాసికంలో (Q3 FY26) కళ్లుచెదిరే ఫలితాలను సాధించింది. గ్లోబల్ ఏపీఐ మార్కెట్లో పెరిగిన డిమాండ్, మెరుగైన నిర్వహణ సామర్థ్యం వెరసి కంపెనీ నికర లాభాన్ని ఏకంగా 11 రెట్లు పెంచాయి.
త్రైమాసిక ఫలితాల హైలైట్స్:
ఆదాయం: ఈ త్రైమాసికంలో కార్యకలాపాల ద్వారా ఆదాయం 21.7% వృద్ధితో రూ. 162.4 కోట్లకు చేరింది. తయారీ ప్లాంట్ల వినియోగం పెరగడం, ఏపీఐ వాల్యూమ్స్ పెరగడం ఇందుకు ప్రధాన బలాన్ని ఇచ్చాయి.
నిర్వహణ లాభం (EBITDA): కంపెనీ EBITDA 81.7% పెరిగి రూ. 26.9 కోట్లుగా నమోదైంది. వ్యయ నియంత్రణ, మెరుగైన సాల్వెంట్ రికవరీ చర్యల వల్ల మార్జిన్లు 11.0% నుంచి 16.5 శాతానికి ఎగబాకాయి.
నికర లాభం (PAT): గత ఏడాది క్యూ3లో కేవలం రూ. 1.2 కోట్లుగా ఉన్న లాభం, ఈసారి అద్భుత రీతిలో 1,194.3% వృద్ధి చెంది రూ. 15.8 కోట్లకు చేరింది.
తొమ్మిది నెలల ఫలితాలు (9M FY26):
తొమ్మిది నెలల కాలానికి కంపెనీ రూ. 485.7 కోట్ల ఆదాయాన్ని, రూ. 44.4 కోట్ల నికర లాభాన్ని నమోదు చేసింది. నికర లాభంలో వార్షిక ప్రాతిపదికన 332.5% వృద్ధి కనిపించింది. ఆర్థిక క్రమశిక్షణ, ఫైనాన్స్ వ్యయాలు తగ్గడం కంపెనీకి లాభదాయకంగా మారింది.
భవిష్యత్ కార్యాచరణ – ఏపీఐ విస్తరణ:
కంపెనీ డైరెక్టర్ మిస్టర్ మోహన్ రాయన మాట్లాడుతూ.. తమ తణుకు ప్లాంట్ నుంచి యూరోపియన్ మార్కెట్కు హై-పొటెంట్ ఎనస్థటిక్ ఏపీఐ షిప్మెంట్ విజయవంతంగా పూర్తయిందని తెలిపారు. త్వరలో యాంటీడయాబెటిక్, యాంటీడిప్రెసంట్, బ్లడ్ థిన్నర్స్ వంటి కొత్త విభాగాల్లోకి మరిన్ని ఉత్పత్తులను తీసుకురానున్నట్లు ఆయన వెల్లడించారు. ఫార్ములేషన్స్ విభాగంలో ‘C-Red’ వంటి న్యూట్రిషనల్ సప్లిమెంట్లకు మార్కెట్లో మంచి స్పందన లభిస్తోందని పేర్కొన్నారు.
