అక్షరటుడే, వెబ్డెస్క్ : Usman Khawaja | అంతర్జాతీయ క్రికెట్లో తనదైన ముద్ర వేసిన ఆస్ట్రేలియా స్టార్ బ్యాటర్ ఉస్మాన్ ఖవాజా సంచలన నిర్ణయం తీసుకున్నాడు. సిడ్నీ వేదికగా ఇంగ్లండ్తో జరగనున్న ఐదో యాషెస్ టెస్టు మ్యాచ్ (Ashes Test Match) అనంతరం అంతర్జాతీయ క్రికెట్ (International Cricket)కు వీడ్కోలు పలుకుతున్నట్లు అధికారికంగా ప్రకటించాడు.
ఆదివారం ప్రారంభం కానున్న ఈ మ్యాచ్తో ఖవాజా 15 ఏళ్ల సుదీర్ఘ అంతర్జాతీయ కెరీర్కు ముగింపు పలకనున్నాడు. 2011లో సిడ్నీ క్రికెట్ గ్రౌండ్లో ఇంగ్లండ్పై టెస్టు అరంగేట్రం చేసిన ఖవాజా, ఇప్పుడు అదే మైదానంలో, అదే ప్రత్యర్థిపై తన చివరి టెస్టు ఆడనుండటం విశేషంగా మారింది. పాకిస్థాన్లోని ఇస్లామాబాద్లో జన్మించి చిన్న వయసులోనే ఆస్ట్రేలియాకు వలస వెళ్లిన ఖవాజా.. ఆసీస్ జట్టు (Australia Team)కు ప్రాతినిధ్యం వహించిన తొలి ముస్లిం క్రికెటర్గా చరిత్ర సృష్టించాడు.
Usman Khawaja | అద్భుతమైన కెరీర్
ఇప్పటివరకు 87 టెస్టులు ఆడిన ఉస్మాన్ ఖవాజా 43.39 సగటుతో 6,206 పరుగులు సాధించాడు. ఇందులో 16 సెంచరీలు, అనేక కీలక ఇన్నింగ్స్లు ఉన్నాయి. టెస్టులతో పాటు వన్డేలు, టీ20 ఫార్మాట్లలోనూ ఆస్ట్రేలియా జట్టుకు సేవలందించి కీలక విజయాల్లో భాగస్వామ్యమయ్యాడు. రిటైర్మెంట్ ప్రకటన సందర్భంగా ఖవాజా భావోద్వేగానికి లోనయ్యాడు. “నేను ఒక ముస్లింని, పాకిస్థాన్ (Pakistan) నుంచి వచ్చిన నల్ల జాతీయుడిని. నేను ఆస్ట్రేలియా జట్టులో ఎప్పటికీ ఆడలేనని చాలామంది అన్నారు. కానీ ఇప్పుడు నన్ను చూసి మీరు కూడా సాధించవచ్చని నమ్ముతున్నాను” అని అన్నాడు.
అయితే ఇటీవల తనపై వచ్చిన విమర్శలపై తీవ్ర అసంతృప్తి వ్యక్తం చేశాడు. పెర్త్ టెస్టులో గాయం కారణంగా ఇబ్బంది పడితే.. తాను సోమరిపోతు, స్వార్థపరుడు, జట్టుపట్ల నిబద్ధత లేనివాడిగా కొందరు మీడియా, మాజీలు వ్యాఖ్యానించారని, ఇవి జాత్యహంకార ధోరణులను ప్రతిబింబిస్తాయని ఖవాజా ఆవేదన వ్యక్తం చేశాడు. ఖవాజా రిటైర్మెంట్ నిర్ణయంపై క్రికెట్ ఆస్ట్రేలియా చీఫ్ టాడ్ గ్రీన్బర్గ్ స్పందించారు. ఆస్ట్రేలియా క్రికెట్కు ఖవాజా చేసిన సేవలు చిరస్మరణీయం. మైదానంలో స్టైలిష్ బ్యాటర్గా, మైదానం బయట ఉస్మాన్ ఖవాజా ఫౌండేషన్ ద్వారా సామాజిక సేవకుడిగా ఎంతోమందికి స్ఫూర్తిగా నిలిచారు అని ప్రశంసించారు. ఆస్ట్రేలియా క్రికెట్ చరిత్రలో ఖవాజా పేరు ప్రత్యేక అధ్యాయంగా నిలవనుండగా, ఆయన చివరి టెస్టుపై క్రికెట్ అభిమానుల్లో భావోద్వేగ వాతావరణం నెలకొంది.
