అక్షరటుడే, వెబ్డెస్క్ : Indian Navy | భారత నావికాదళం మరింత బలోపేతం కానుంది. మరో రెండు అధునాతన యుద్ధ నౌకలు మంగళవారం నేవీలో చేరనున్నాయి. సముద్ర తీర రక్షణలో నేవీకి మరింత ఊతమిచ్చేలా ఐఎన్ఎస్ ఉదయగిరి, ఐఎన్ఎస్ హిమగిరి స్టెల్త్ గైడెడ్-క్షిపణి (Himagiri Stealth Guided-Missile) యుద్ధనౌకలు నావికాదళంలో చేరనున్నాయి.
అత్యాధునికమైన ఈ యుద్ధనౌకల రాకతో నేవీ మరింత పటిష్టవంతంగా మారనుంది. రెండు యుద్ధనౌకల చేరికతో ఇండో-పసిఫిక్ ప్రాంతంలో భారతదేశ నావికా సామర్థ్యం మరింత బలోపేతమవుతుంది. ఈ రెండు నౌకలు బహుళ- కార్యకలాపాల కోసం రూపొందించబడ్డాయి. సాంప్రదాయ, సాంప్రదాయేతర సముద్ర ముప్పులను ఎదుర్కోవడంలో ఇవి కీలక పాత్ర పోషిస్తాయని భావిస్తున్నారు.
Indian Navy | INS ఉదయగిరి..
ముంబైలో మజగాన్ డాక్ షిప్బిల్డర్స్ లిమిటెడ్ (Mazagon Dock Shipbuilders Limited) నిర్మించిన INS ఉదయగిరి ప్రాజెక్ట్ 17A సిరీస్లో రెండోది. ఇది నేవీ వార్షిప్ డిజైన్ బ్యూరో రూపొందించిన 100వ నౌక కావడం విశేషం. ఆంధ్రప్రదేశ్లోని ఉదయగిరి (Udayagiri) పర్వత శ్రేణి పేరు దీనికి పెట్టారు. గతంలో ఇదే పేరుతో ఉన్న యుద్ధ నౌక 1976 నుంచి 2007 వరకు సేవలందించింది. దాని స్థానంలో మరింత అత్యాధునిక స్టెల్త్ గైడెడ్ టెక్నాలతో ఐఎన్ఎస్ ఉదయగిరిని కేవలం 37 నెలల్లోనే నిర్మించారు. ఈ ఫ్రిగేట్ దాదాపు 6,700 టన్నుల బరువును కలిగి ఉంటుంది. రాడార్, ఇన్ఫ్రారెడ్, అకౌస్టిక్ సిగ్నేచర్లను తగ్గించడానికి అధునాతన స్టెల్త్ డిజైన్ను కలిగి ఉంటుంది. డీజిల్ ఇంజిన్లు, గ్యాస్ టర్బయిన్లను ఉపయోగించి కంబైన్డ్ డీజిల్ లేదా గ్యాస్ (CODOG) ప్రొపల్షన్ సిస్టమ్ ద్వారా నడుస్తుంది.
బ్రహ్మోస్ సూపర్సోనిక్ (Brahmos Supersonic) యాంటీ-షిప్ క్షిపణులు, బరాక్ 8 సర్ఫేస్-టు-ఎయిర్ క్షిపణులు, 76 mm మెయిన్ గన్, క్లోజ్-ఇన్ వెపన్ సిస్టమ్, అధునాతన యాంటీ-సబ్మెరైన్ వార్ఫేర్ వెపన్రీ వంటివి ఇందులో ఉన్నాయి. దాదాపు 75 శాతం స్వదేశీ సామగ్రితో రూపొందిన ఈ నౌక ఇంటిగ్రేటెడ్ ప్లాట్ఫాం మేనేజ్మెంట్ సిస్టమ్(Integrated Platform Management System) అధునాతన స్థానిక సెన్సార్లు, ఆయుధాలను కూడా కలిగి ఉంది. ఉదయగిరి నిర్మాణంలో 200 కంటే ఎక్కువ MSMEలు పాల్గొన్నాయి, దాదాపు 4వేల వరకు ప్రత్యక్షంగా, 10,000 వేల వరకు పరోక్షంగా ఉద్యోగులు ఇందలో పాలు పంచుకున్నారు.
Indian Navy | INS హిమగిరి
INS హిమగిరిని కోల్కతాలోని గార్డెన్ రీచ్ షిప్ బిల్డర్స్ అండ్ ఇంజనీర్స్ (GRSE) నిర్మించింది. ప్రాజెక్ట్ 17A నౌకలలో ఇది మొదటిది. 1974 నుండి 2005 వరకు నావికాదళానికి సేవలందించిన అసలు INS హిమగిరి(Himagiri) స్థానంలో అధునాతన టెక్నాలజీతో దాదాపు 75 శాతం స్వదేశీ సామగ్రితోనే రూపుదిద్దుకుంది. సుమారు 6,670 టన్నుల బరువు, 149 మీటర్ల పొడవుతో ఉండే INS హిమగిరి రాడార్ మరియు ఇన్ఫ్రారెడ్ తగ్గించడానికి మెరుగైన స్టెల్త్ లక్షణాలను కలిగి ఉంది. దీని CODOG ప్రొపల్షన్ సిస్టమ్ 28 నాట్లకు పైగా వేగాన్ని, బ్లూ-వాటర్ కార్యకలాపాలకు దీర్ఘకాల ఓర్పును అనుమతిస్తుంది.
ఉదయగిరి మాదిరిగానే ఇది బ్రహ్మోస్ క్షిపణులు, బరాక్ 8 ఎయిర్ డిఫెన్స్ సిస్టమ్స్, క్లోజ్-ఇన్ వెపన్ సిస్టమ్స్, యాంటీ-సబ్మెరైన్ రాకెట్ లాంచర్లు(Anti Submarine Rocket Launchers), టార్పెడో ట్యూబ్లు, అధునాతన ఎలక్ట్రానిక్ వార్ఫేర్ సిస్టమ్లను కలిగి ఉంది. ఫ్రిగేట్లో MH-60 రోమియో, ALH ధ్రువ్ Mk-III, సీ కింగ్ హెలికాప్టర్లను ఆపరేట్ చేయగల ఫ్లైట్ డెక్, హ్యాంగర్ కూడా ఉన్నాయి. ఇది నిఘా, యాంటీ-సబ్మెరైన్, సెర్చ్-అండ్-రెస్క్యూ మిషన్లలో బలమైన ఆధిక్యాన్ని ప్రదర్శిస్తుంది.
స్టెల్త్ ఫ్రిగేట్ అనేది రాడార్, ఇన్ఫ్రారెడ్, అకౌస్టిక్ సిస్టమ్లతో సహా శత్రు సెన్సార్లకు దాని దృశ్యమానతను తగ్గించడానికి అధునాతన స్టెల్త్ టెక్నాలజీతో నిర్మించబడిన ఆధునిక యుద్ధనౌక. దీని డిజైన్తో ప్రత్యేకంగా ఆకారంలో ఉన్న హల్స్, తక్కువ-పరిశీలించదగిన పదార్థాలు, రాడార్ క్రాస్-సెక్షన్, హీట్ సిగ్నేచర్లు, శబ్ద స్థాయిలను తగ్గించడానికి కఠినమైన ఉద్గార నియంత్రణలు ఉంటాయి. ఈ లక్షణాలు నౌకను యుద్ధంలో గుర్తించడం, ట్రాక్ చేయడం, లక్ష్యంగా చేసుకునే అవకాశాలు చాలా తక్కువ.
