అక్షరటుడే, వెబ్డెస్క్: Shani Trayodashi | హిందూ ధర్మంలో శనీశ్వరుడిని కర్మ ఫల ప్రదాతగా, న్యాయ దేవుడిగా కొలుస్తాం. మనం చేసే మంచి చెడులను బట్టి ఫలితాలను ఇచ్చే శని దేవుడి అనుగ్రహం కోసం భక్తులు ఎదురుచూసే పర్వదినం ‘శని త్రయోదశి’. శనివారం, త్రయోదశి తిథి కలిసిన రోజుకు ఆధ్యాత్మికంగా ఎంతో ప్రాముఖ్యం ఉంది. ఈ రోజున చేసే పూజలు అటు శివుడికి, ఇటు శనీశ్వరుడికి నేరుగా చేరుతాయని వేద పండితులు చెబుతున్నారు.
Shani Trayodashi | శని త్రయోదశి ఎప్పుడు?
2026 సంవత్సరపు మొట్టమొదటి శని త్రయోదశి జనవరి నెల చివరలో వస్తోంది. తిథి సమయాల వివరాలు ఇలా..
తిథి ప్రారంభం: జనవరి 30, 2026 (శుక్రవారం) ఉదయం 11:09 గంటలకు.
తిథి ముగింపు: జనవరి 31, 2026 (శనివారం) ఉదయం 08:26 గంటలకు.
శాస్త్రం ప్రకారం సూర్యోదయ సమయంలో ఏ తిథి ఉంటుందో ఆ రోజునే పండుగ(ఆ రోజునే ఆ తిథి ప్రభావం ఉంటుందని)గా పరిగణిస్తారు. అందుకని, జనవరి 31, శనివారం రోజునే శని త్రయోదశిని నిర్వహిస్తారు. శనివారం ఉదయం పూజలు నిర్వహించడం అత్యంత ఫలప్రదం.
Shani Trayodashi | శని త్రయోదశి విశిష్టత..
పురాణాల ప్రకారం శని దేవుడు త్రయోదశి తిథి నాడే జన్మించారని ప్రతీతి. అందుకే ఈ తిథి ఆయనకు ఎంతో ఇష్టం.
దోష నివారణ: జాతకంలో ఏలినాటి శని, అష్టమ శని / అర్ధాష్టమ శని ప్రభావంతో ఇబ్బందులు పడేవారికి ఈ రోజు ఒక అద్భుతమైన అవకాశం. ఈ రోజు చేసే దానధర్మాలు దోష తీవ్రతను తగ్గించి మనశాంతిని ఇస్తాయి.
ఆయురారోగ్యాలు: కేవలం భయం వల్ల కాకుండా, దీర్ఘకాలిక అనారోగ్య సమస్యల నుంచి బయటపడటానికి, ఆయుష్షు పెరగడానికి కూడా శని త్రయోదశి నాడు పూజలు చేస్తారు.
పూజా విధానం, పరిహారాలు:
శని దేవుడి అనుగ్రహం పొంది, కష్టాల నుంచి గట్టెక్కడానికి భక్తులు ఈ క్రింది పద్ధతులు పాటించడం ఉత్తమం.
తైలాభిషేకం: తెల్లవారుజామునే స్నానం ఆచరించి, శనీశ్వరుడిని దర్శించుకుని నువ్వుల నూనెతో అభిషేకం చేయాలి. ఈ నూనెలో ముఖం చూసుకుని దానిని శని దేవునికి సమర్పించడం వల్ల పీడలు తొలగుతాయని విశ్వాసం.
రావి చెట్టు పూజ: రావి చెట్టులో త్రిమూర్తులు కొలువై ఉంటారని శాస్త్రం చెబుతోంది. ఈ రోజున రావి చెట్టు కింద నువ్వుల నూనెతో దీపం వెలిగించి 7 లేదా 11 ప్రదక్షిణలు చేయడం వల్ల గొప్ప మార్పు కనిపిస్తుంది.
దానధర్మాలు: నల్ల నువ్వులు, నల్లని వస్త్రాలు, గొడుగు, పాదరక్షలు లేదా ఇనుముతో చేసిన వస్తువులను పేదలకు దానం చేయడం శుభప్రదం.
శని దేవుడి వాహనమైన కాకికి అన్నం పెట్టడం లేదా కుక్కలకు ఆహారం అందించడం వల్ల దోష నివారణ జరుగుతుంది. పక్షులకు దాహం తీర్చడం కూడా మంచి ఫలితాలను ఇస్తుంది.
శని స్తోత్ర పఠనం: పూజా సమయంలో ‘శని అష్టోత్తరం’ లేదా ‘దశరథ ప్రోక్త శని స్తోత్రం’ చదవడం వల్ల మానసిక ధైర్యం లభిస్తుంది.
