అక్షరటుడే, వెబ్డెస్క్ : Tirumala | తిరుమల శ్రీవారిని నిత్యం వేలాది మంది భక్తులు దర్శించుకుంటారు. దేశ నలుమూలల నుంచి భక్తులు తిరుమలకు వస్తుంటారు. దీంతో భక్తులకు టీటీడీ (TTD) అధికారులు సౌకర్యాలు ఏర్పాటు చేయడంతో పాటు ఆన్లైన్లో టికెట్లు విడుదల చేస్తున్నారు.
టీటీడీ అధికారులు 2026 మార్చి నెలకు సంబంధించిన టికెట్ల విడదల వివరాలను వెల్లడించారు. శ్రీవారి సుప్రభాతం, తోమాల, అర్చన, అష్టదళ పాదపద్మారాధన సేవకు సంబంధించిన మార్చి నెల కోటాను డిసెంబర్ 18న ఉదయం 10 గంటలకు టీటీడీ విడుదల చేయనుంది. ఈ టికెట్లు ఎలక్ట్రానిక్ డిప్ కోసం డిసెంబర్ 20న ఉదయం 10 గంటల వరకు ఆన్లైన్లో నమోదు చేసుకునే అవకాశం ఉంది. టికెట్లు పొందిన వారు డిసెంబర్ 20 నుంచి 22 మధ్యాహ్నం 12 గంటలలోపు డబ్బులు చెల్లించాలి.
Tirumala | ఆర్జిత సేవా టికెట్లు
శ్రీవారి కల్యాణోత్సవం (Kalyanotsavam), ఊంజల్ సేవ, బ్రహ్మోత్సవం, సహస్రదీపాలంకార సేవ, శ్రీవారి సాలకట్ల తెప్పోత్సవాలు, శ్రీవారి సాలకట్ల వసంతోత్సవాల టికెట్లను ఈ నెల 22న ఉదయం 10 గంటలకు అధికారులు విడుదల చేయనున్నారు. వర్చువల్ సేవలు, వాటి దర్శన స్లాట్లకు సంబంధించిన కోటాను అదే రోజు మధ్యాహ్నం 3 గంటలకు ఆన్లైన్లో పెడతారు.
Tirumala | అంగ ప్రదక్షిణ టోకెన్లు
అంగ ప్రదక్షిణ టోకెన్ల కోటాను 23న ఉదయం 10 గంటలకు, శ్రీవాణి ట్రస్టు (Srivani Trust) దర్శన టికెట్ల కోటాను ఉదయం 11 గంటలకు, వృద్ధులు, దివ్యాంగులు, దీర్ఘకాలిక వ్యాధులున్న వారి కోసం ఉచిత ప్రత్యేక దర్శనం టోకెన్ల కోటాను 3 గంటలకు విడుదల చేయనున్నారు. ప్రత్యేక ప్రవేశ దర్శన టికెట్ల కోటాను 24న ఉదయం 10 గంటలకు ఆన్లైన్లో విడుదల చేస్తారు. టీటీడీ ఆఫీషయల్ వెబ్సైట్లో టికెట్లు బుక్ చేసుకోవాలని అధికారులు సూచించారు.
