CM Nizamabad Tour | నిజామాబాద్​ జిల్లాను అభివృద్ధి చేసే బాధ్యత నాది: సీఎం రేవంత్​ రెడ్డి

అక్షరటుడే, వెబ్​డెస్క్​: CM Nizamabad Tour | నిజామాబాద్​ జిల్లా తనకు ఎంతో ప్రత్యేకమైందని సీఎం రేవంత్​ రెడ్డి (CM Revanth Reddy) తెలిపారు. ఈ ప్రాంతాన్ని అభివృద్ధి చేసే బాధ్యత తనదని పేర్కొన్నారు. నిజామాబాద్​ రూరల్​ నియోజకవర్గంలోని బర్ధిపూర్​లో నిర్వహించిన సభలో ఆయన ప్రసంగించారు. తాను ముఖ్యమంత్రి కాక ముందు రైతుల సమస్యపై నిజామాబాద్​ జిల్లాకు వచ్చానన్నారు. నాడు ఇక్కడి ప్రజలు ఇచ్చిన ఆశీర్వాదంతోనే తాను ముఖ్యమంత్రిని అయ్యానని చెప్పారు. తనను ముఖ్యమంత్రి చేయాలని అధినాయకత్వం గుర్తించడానికి నిజామాబాద్​ జిల్లానే వేదిక అయ్యిందని గుర్తు చేశారు. ఈ జిల్లాను అభివృద్ధి చేసే బాధ్యత తనది తెలిపారు. నిజామాబాద్​ ఔటర్​ రింగ్​ రోడ్డు, మంచిప్ప ప్రాజెక్టు  పూర్తి చేసే బాధ్యత తీసుకుంటానని చెప్పారు.

CM Nizamabad Tour | చైతన్యవంతమైన జిల్లా

అంకాపూర్​ చికెన్ (Ankapoor chicken)​, నిజామాబాద్​ పసుపు ఎంతో ప్రముఖమైనవన్నారు. గతంలో క్వింటాలు పసుపు అమ్మితే తులం బంగారం వచ్చేదన్నారు. నిజామాబాద్​ జిల్లా రైతాంగం చైతన్యవంతమైందన్నారు. రైతాంగ పోరాటంలో ఈ జిల్లా ముందుంటుందన్నారు. వైఎస్​ రాజశేఖర్​ రెడ్డి, డి.శ్రీనివాస్​ నాయకత్వంలో రాష్ట్రంలో కాంగ్రెస్​ అధికారంలోకి వచ్చిందన్నారు. 2023 ఎన్నికల్లోనూ కాంగ్రెస్​ పార్టీని అధికారంలోకి తీసుకు వచ్చామన్నారు. 2029లో పీసీసీ అధ్యక్షుడు మహేశ్​కుమార్​ గౌడ్​,  తన నాయకత్వంలో రెండోసారి కాంగ్రెస్​ పార్టీ అధికారంలోకి తీసుకువచ్చే బాధ్యత తీసుకుంటామని చెప్పారు.

CM Nizamabad Tour | బంగారం లాంటి అవకాశం

మున్సిపల్​ ఎన్నికల్లో (Municipal Elections) బీఆర్​ఎస్​, బీజేపీకి ఓటు వేస్తే వృథా అని రేవంత్​ రెడ్డి అన్నారు. రాష్ట్రంలో కాంగ్రెస్​ పార్టీ అదికారంలో ఉందని.. ఏ పని చేయాలన్నా ఇక్కడే చేసుకోవచ్చన్నారు. గల్లీలో మోరీ చేయాలంటే ఢిల్లీకి వెళ్లాలా అని ప్రశ్రించారు. నిజామాబాద్​ కార్పొరేషన్​ మేయర్​, మున్సిపాలిటీ ఛైర్మన్లు, కార్పొరేటర్లు మన వాళ్లు ఉంటే అభివృద్ధి వేగంగా జరుగుతుందన్నారు. నిజామాబాద్​ జిల్లా నుంచి ఉద్ధండ నేతలు ఉన్నారని.. వారికి డైరెక్ట్​గా ముఖ్యమంత్రిని నిధులు అడిగే చనువు ఉందన్నారు. బంగారం లాంటి అవకాశాన్ని జారవిడుచుకోవద్దని సూచించారు. ప్రజలు కాంగ్రెస్​ పార్టీకి ఓటు వేసి ఆశీర్వదించాలని కోరారు. అభివృద్ధిలో నిజామాబాద్​కు ప్రత్యేక స్థానం కల్పిస్తామని.. ఇక్కడి నుంచే అభివృద్ధికి నాంది పలుకుతామన్నారు.

CM Nizamabad Tour | స్మార్ట్​ సిటీ ఎందుకు చేయలేకపోయారు

నిజామాబాద్​ ఎంపీ ధర్మపురి అర్వింద్​ (MP Dharmapuri Arvind) మోదీ మంత్రం చదువుతున్నారని సీఎం రేవంత్​ అన్నారు. మోదీ దగ్గర పరపతి ఉందని చెప్పుకుంటున్నారని.. ఏడేళ్లలో ఈ జిల్లాకు ఏం చేశారో చెప్పాలని ప్రశ్నించారు. అంత పరపతి ఉంటే నిజామాబాద్​ను ఎందుకు స్మార్ట్​ సిటీ చేయలేకపోయారన్నారు. నిజామాబాద్​ ఎయిర్​ పోర్టు ఎందుకు మంజూరు కాలేదన్నారు. ఏం తెచ్చారని ఓటు అడుగుతున్నారని ప్రశ్నించారు. అర్వింద్​కు నిజామాబాద్​ ప్రజల ఓట్లు కావాలి.. కానీ.. అభివృద్ధి చేయాలనే లేదని విమర్శలు చేశారు. ఈ రాష్ట్రం నుంచి ఎనిమిది బీజేపీ ఎంపీలను గెలిపిస్తే తెలంగాణకు నిధులు తేలేకపోయారని.. ఓటు అడిగే మీ హక్కు లేదన్నారు.

CM Nizamabad Tour | రూ. వందల కోట్లతో అభివృద్ధి పనులు

ఉమ్మడి నిజామాబాద్​ జిల్లాలో రూ. వందల కోట్లతో అభివృద్ధి పనులు చేపడుతున్నామని సీఎం రేవంత్​ రెడ్డి తెలిపారు. బాన్సువాడు, కామారెడ్డి, ఎల్లారెడ్డి, బిచ్కుంద, ఆర్మూర్​, భీమ్​గల్​, బోధన్​, నిజామాబాద్​ మున్సిపల్​ కార్పొరేషన్లలో రూ. 1,045 కోట్లతో అభివృద్ధి కార్యక్రమాలు చేపడుతున్నామని వివరించారు. నిజామాబాద్​ జిల్లాకు ఇంజినీరింగ్​ కళాశాల, వ్యవసాయ కళాశాల, ఇంటిగ్రేటెడ్​ స్కూల్​ తదితర రూ. 600 కోట్ల అభివృద్ధి పనులు చేపట్టామన్నారు. గత రెండు సంవత్సరాల్లో నిధులు ఇచ్చినా బీఆర్​ఎస్​ ప్రజాప్రతినిధులు అభివృద్ధిని అడ్డుకున్నారన్నారు. అందుకే కాంగ్రెస్​ అభ్యర్థులను గెలిపించాలని కోరారు. మున్సిపల్​ ఎన్నికల్లో నిజామాబాద్​ జిల్లాలో కాంగ్రెస్​ పార్టీ జెండా ఎగురవేయనుందని ధీమా వ్యక్తం చేశారు.

సమావేశంలో మంత్రులు ఉత్తమ్​ కుమార్​ రెడ్డి, తుమ్మల నాగేశ్వర్​, పీసీసీ ఛీప్​ మహేశ్​ కుమార్​ గౌడ్​, ప్రభుత్వ సలహాదారులు సుదర్శన్​ రెడ్డి, షబ్బీర్​అలీ, వేణుగోపాల్​, ఎమ్మెల్యే భూపతిరెడ్డి, ఎమ్మెల్సీ బల్మూరి వెంకట్​, ముఖ్యనేతలు మండవ వెంకటేశ్వర్​ రావు, టీజీఎండీసీ ఛైర్మన్​ ఈరవత్రి అనిల్​, సహకార యూనియన్​ లిమిటెడ్​ ఛైర్మన్​ మోహన్​ రెడ్డి, డీసీసీ అధ్యక్షుడు నగేశ్​ రెడ్డి తదితరులు పాల్గొన్నారు.