అక్షరటుడే, వెబ్డెస్క్: Aadhaar App | దేశంలో ప్రతి పనికి ఆధార్ నంబర్ తప్పనిసరి. సంక్షేమ ఫలాలు అందాలంటే ఆధార్ ఉండాల్సిందే. అది లేకపోతే ఏ ప్రభుత్వ పథకాల నుంచి లబ్ధి పొందలేం.
ఆధార్ కార్డు (Aadhaar Card)లో ఏమైనా మార్పులు చేయాల్సి వస్తే ప్రజలు అనేక ఇబ్బందులు పడుతున్నారు. ఆధార్ కార్డులు ఫోన్ నంబర్, చిరునామా మార్పుల కోసం నిత్యం ఎంతో మంది ఆధార్ సెంటర్లకు వెళ్తున్నారు. అయితే ఆధార్ సెంటర్లు (Aadhaar Centers) తక్కువ సంఖ్యలో ఉండటంతో ప్రజలు అనేక ఇబ్బందులు పడుతున్నారు. ఈ క్రమంలో కేంద్ర ప్రభుత్వం ఆధార్ యాప్ను తీసుకొచ్చింది. దీంతో ఆధార్ సెంటర్లకు వెళ్లకుండనే.. ఫోన్ ద్వారా ఆధార్ కార్డులో పలు మార్పులు చేసుకోవచ్చు. బుధవారం ఢిల్లీలో కేంద్ర మంత్రి అశ్వినీ వైష్ణవ్ (Minister Ashwini Vaishnav) ఈ యాప్ను జాతికి అంకితం చేశారు.
Aadhaar App | సులభతరంగా..
ప్రజల డిజిటల్ గుర్తింపు నిర్వహణను స్మార్ట్ఫోన్ (Smartphone) నుంచే సులభతరం, సౌకర్యవంతంగా చేయడం లక్ష్యంగా UIDAI కొత్త ఆధార్ యాప్ను విడుదల చేసింది. కొత్త ఆధార్ యాప్ ద్వారా ఆధార్ నంబర్, బయోమెట్రిక్ డేటాను పంచుకోకుండా గుర్తింపును నిర్ధారించగల ఆఫ్లైన్ ఆధార్ ధృవీకరణను చేపట్టవచ్చు. అంతేగాకుండా యాప్ వినియోగదారులు మొబైల్ నంబర్లు, చిరునామాల వంటి కీలక వివరాలను ఫోన్ నుంచే మార్చుకోవచ్చు. ఈ యాప్ను గూగుల్ ప్లే స్టోర్, ఐవోఎస్ నుంచి డౌన్లోడ్ చేసుకోవచ్చు.
Aadhaar App | యాప్తో లాభాలు
యాప్ను డౌన్లోడ్ చేసిన తర్వాత వినియోగదారులు ఇంటర్నెట్ కనెక్షన్ లేకుండా, వ్యక్తిగత వివరాలను బహిర్గతం చేయకుండా ఆఫ్లైన్లో వారి గుర్తింపును ధృవీకరించవచ్చు. ఫోన్ నంబర్, చిరునామా మార్చుకోవడానికి యాప్లోకి లాగిన్ అవ్వండి. హోమ్ స్క్రీన్లో ‘ఆధార్ అప్డేట్’ (Aadhaar Update) విభాగాన్ని క్లిక్ చేయాలి. అనంతరం అక్కడ మనం ఏ వివరాలు మార్చాలి అనుకుంటున్నామో దానిని ఎంటర్ చేయాలి. అనంతరం వివరాలు నమోదు చేసి, ఫీజు కడితే ఫోన్ నంబర్, చిరునామా మారుతాయి.
