అక్షరటుడే, వెబ్డెస్క్ : TGSRTC app ticket booking | ఆర్టీసీ బస్సుల్లో యాప్ ద్వారా టికెట్లు బుక్ చేసుకునే విధానాన్ని ప్రభుత్వం ప్రవేశ పెట్టింది. ‘మీసేవా మొబైల్ యాప్’ ద్వారా TGSRTC బస్ టికెట్ బుకింగ్ చేసుకోవచ్చు.
యాప్ ద్వారా టికెట్ బుక్ చేసుకునే సౌకర్యాన్ని మంత్రి పొన్నం ప్రభాకర్ (Minister Ponnam Prabhakar), స్పెషల్ చీఫ్ సెక్రటరీ వికాస్ రాజ్, ఆర్టీసీ ఎండీ నాగిరెడ్డి మంగళవారం ప్రారంభించారు. ‘మీ సేవా – మీ టికెట్’ (‘MeeSeva – MeTicket’) యాప్ ద్వారా టికెట్లతో పాటు అనేక రకాల సేవలను ప్రయాణికులు పొందవచ్చు. సిటీ బస్ పాస్లు, T-24 టిక్కెట్ల డిజిటల్ బుకింగ్ చేసుకోవచ్చు. ఈ వ్యవస్థ OPRS (ఆన్లైన్ ప్యాసింజర్ రిజర్వేషన్ సిస్టమ్) సేవలను మొబైల్ ప్లాట్ఫామ్లో అనుసంధానిస్తుంది. దీంతో ప్రయాణికులు సుదూర, ఇంటర్సిటీ బస్సు టిక్కెట్లను డిజిటల్గా బుక్ చేసుకోవచ్చు.
TGSRTC app ticket booking | యాప్లో ఉన్న సేవలు
మొత్తం OPRS సేవలు 1,710. రోజుకు 13 వేల టికెట్లు బుక్ చేసుకునే అవకాశం ఉంది. బెంగళూరు, తిరుపతి, విశాఖపట్నం, విజయవాడ, మంచిర్యాల, ఖమ్మం, ఆదిలాబాద్, ఆసిఫాబాద్, వరంగల్ వంటి ముఖ్య నగరాలకు టికెట్లను ఈ యాప్ ద్వారా బుక్ చేసుకోవచ్చు.
TGSRTC app ticket booking | డిజిటల్ సిటీ బస్ పాస్లు
హైదరాబాద్ (Hyderabad) నగర ప్రయాణికుల కోసం ఐదు కేటగిరీల నెలవారీ సిటీ బస్ పాస్లు డిజిటల్గా అందుబాటులో ఉన్నాయి. పాస్లను ఆన్లైన్లో కొనుగోలు చేయవచ్చు, రెన్యువల్ చేసుకోవచ్చు. నెల వారి పాస్ల ధరలు ఇలా ఉన్నాయి. ఆర్డినరీ పాస్ రూ.1,400, మెట్రో ఎక్స్ప్రెస్ పాస్ రూ.1,600, మెట్రో డీలక్స్ పాస్ రూ.1,800, గ్రీన్ మెట్రో లగ్జరీ A/C పాస్ – రూ.2,200, పుష్పక్ A/C పాస్ రూ.5,000గా ఉంది. ఆయా పాస్లను యాప్ ద్వారా ప్రయాణికులు బుక్ చేసుకోవచ్చు.
TGSRTC app ticket booking | T-24 టికెట్
గ్రేటర్ హైదరాబాద్ (జంట నగరాలు) జోన్ కోసం MeTicket మొబైల్ యాప్లో కూడా T-24 టికెట్ విలీనం చేశారు. T-24 టికెట్ అనేది 24 గంటల డిజిటల్ ట్రావెల్ పాస్,. ఈ టికెట్ బుక్ చేసుకుంటే.. 24 గంటల పాటు సిటీ ఆర్డినరీ, మెట్రో ఎక్స్ప్రెస్, మెట్రో డీలక్స్ బస్సుల్లో ఉచితంగా ప్రయాణించవచ్చు.
