అక్షరటుడే, వెబ్డెస్క్ : TG RERA Notices Builders | నిబంధనలు పాటించని పలువురు బిల్డర్లు, డెవలపర్లకు తెలంగాణ రియల్ ఎస్టేట్ రెగ్యూలేటరి అథారిటీ (RERA) షాక్ ఇచ్చింది. శనివారం షోకాజ్ నోటీసులు జారీ చేసింది.
రెరా రిజిస్ట్రేషన్ లేకుండా ప్రీ-లాంచ్ ప్రకటనల (Pre-launch announcements) ద్వారా గృహ కొనుగోలుదారులను పలు సంస్థలు తప్పుదారి పట్టిస్తున్నాయి. అంతేగాకుండా ప్రీ లాంచ్ పేరిట డబ్బులు వసూలు చేసి మోసాలకు పాల్పడుతున్నాయి. ఈ క్రమంలో రెరా ప్రమోటర్లు/డెవలపర్లు, రియల్ ఎస్టేట్ ఏజెంట్లు, ప్రకటన ఛానెల్లకు తీవ్రమైన హెచ్చరిక జారీ చేసింది. రియల్ ఎస్టేట్ చట్టం ప్రకారం 500 చదరపు మీటర్లు దాటిన ప్రతి రియల్ ఎస్టేట్ ప్రాజెక్ట్, 8 యూనిట్ల కంటే ఎక్కువ ప్రతిపాదించబడిన అపార్ట్మెంట్లను TG-RERAలో తప్పనిసరిగా నమోదు చేసుకోవాలని పేర్కొంది. ప్రత్యేకమైన రెరా రిజిస్ట్రేషన్ నంబర్ను కేటాయించిన తర్వాత మాత్రమే డెవలపర్లు యూనిట్లను ప్రకటించడానికి, మార్కెట్ చేయడానికి, విక్రయించడానికి అనుమతి ఉంటుందని తెలిపింది.
TG RERA Notices Builders | పలు సంస్థలకు..
నిబంధనలకు అనుగుణంగా, తప్పనిసరి రిజిస్ట్రేషన్ నంబర్ను ప్రదర్శించడంలో విఫలమైన, చట్టవిరుద్ధమైన ప్రకటనలను కనుగొన్న తర్వాత రెరా అధికారులు సంబంధిత ప్రాజెక్ట్ సంస్థలకు షో-కాజ్ నోటీసులు జారీ చేశారు. గోద్రేజ్ ప్రాపర్టీస్ (Godrej Properties), నవనామి ఎలివేట్ ప్రాజెక్ట్, వెర్టెక్స్ విరాట్ ప్రాజెక్ట్, స్వర్గసీమ అమేయ ప్రాజెక్ట్, తిరుమల హిల్స్ వంటి సంస్థలకు నోటీసులు ఇచ్చింది. స్వర్గసీమ కన్స్ట్రక్షన్ అమేయ ప్రాజెక్ట్ విషయంలో పూర్తి ప్రాజెక్ట్ పేరును తొలగించడం వంటి ఉల్లంఘనలను అథారిటీ గుర్తించింది. ప్రాజెక్ట్ ‘లేఅవుట్’గా నమోదు చేయగా.. పూర్తి నివాస ప్రాజెక్ట్గా ప్రచారం చేశారు. దీనిపై సైతం రెరా చర్యలకు సిద్ధం అయింది.
