అక్షరటుడే, వెబ్డెస్క్: Under 19 World Cup | అండర్-19 వరల్డ్ కప్ సూపర్-6 దశలో భారత జట్టు తన తొలి మ్యాచ్లోనే అద్భుత ప్రదర్శనతో ప్రత్యర్థులకు గట్టి సందేశం పంపింది. టాస్ ఓడి ముందుగా బ్యాటింగ్కు దిగిన టీమిండియా నిర్ణీత 50 ఓవర్లలో 8 వికెట్ల నష్టానికి 352 పరుగుల భారీ స్కోరు సాధించి, మ్యాచ్పై పూర్తిస్థాయి పట్టు సాధించింది. ఆరంభం నుంచే భారత బ్యాట్స్మెన్లు దూకుడు చూపడంతో జింబాబ్వే బౌలర్లకు చుక్కలు కనిపించాయి.
ఓపెనర్ వైభవ్ సూర్యవంశీ (Vaibhav Suryavanshi) మరోసారి తన అద్భుత ఫామ్ను చాటాడు. కేవలం 24 బంతుల్లోనే హాఫ్ సెంచరీ పూర్తి చేసిన అతడు, మొత్తం 30 బంతుల్లో 52 పరుగులు చేసి ఇన్నింగ్స్కు మెరుపు ఆరంభం అందించాడు. నాలుగు ఫోర్లు, నాలుగు సిక్సర్లతో వైభవ్ ఆడిన ఇన్నింగ్స్ అభిమానులను అలరించింది.
Under 19 World Cup | చుక్కలు చూపించారు.
కెప్టెన్ ఆయుష్ మ్హాత్రే (Captain Ayush Mhatre) ఈ మ్యాచ్లో బ్యాటింగ్లో పెద్దగా రాణించలేక 21 పరుగులకే పరిమితమయ్యాడు. అయితే మధ్య ఓవర్లలో వచ్చిన విహాన్ మల్హోత్రా జట్టును ఆదుకుంటూ ఇన్నింగ్స్ను మరో స్థాయికి తీసుకెళ్లాడు.విహాన్ మల్హోత్రా (Vihan Malhotra) అద్భుతమైన సెంచరీతో ఈ మ్యాచ్కు హైలైట్గా నిలిచాడు. 107 బంతుల్లో 109 పరుగులు చేసి అజేయంగా నిలిచిన అతడు, బాధ్యతాయుతమైన బ్యాటింగ్తో పాటు అవసరమైన వేళ దూకుడూ చూపించాడు. అతనికి వికెట్ కీపర్ అభిజ్ఞాన్ కుందు చక్కని సహకారం అందించాడు. కుందు 61 పరుగులు చేసి కీలక హాఫ్ సెంచరీ నమోదు చేయడంతో భారత్ స్కోరు వేగంగా పరుగులు పెట్టింది. ఫలితంగా టీమిండియా (Team India) 350కి పైగా స్కోరు నమోదు చేసి జింబాబ్వే ముందు భారీ లక్ష్యాన్ని ఉంచింది.
353 పరుగుల కఠిన లక్ష్యంతో చేజింగ్కు దిగిన జింబాబ్వే (Zimbabwe)కు భారత బౌలర్లు ఆరంభం నుంచే షాక్ ఇచ్చారు. ఆర్ఎస్ అంబరీష్, హెనిల్ పటేల్ తమ పదునైన బంతులతో ఓపెనర్లను త్వరగా పెవిలియన్కు పంపారు. అయితే మధ్యలో లీరోయ్ చివాలా (62), కియాన్ బ్లిగ్నాట్ (37) కొద్దిసేపు నిలబడి ప్రతిఘటించడంతో ఒక దశలో జింబాబ్వే స్కోరు 4 వికెట్లకు 142 పరుగులుగా మారింది. ఆ సమయంలో మ్యాచ్లో కొంత ఉత్కంఠ నెలకొంది. అయితే అక్కడి నుంచి మ్యాచ్ పూర్తిగా భారత్ వైపు మళ్లింది. కెప్టెన్ ఆయుష్ మ్హాత్రే స్వయంగా బంతిని చేతబట్టి కీలక బ్రేక్థ్రూలు సాధించగా, లెఫ్ట్ ఆర్మ్ సీమర్ ఉద్ధవ్ మోహన్ కూడా తన స్పెల్తో జింబాబ్వే బ్యాటింగ్ను పూర్తిగా కూల్చేశాడు. భారత బౌలర్ల ధాటికి జింబాబ్వే చివరి 6 వికెట్లను కేవలం 6 పరుగుల వ్యవధిలోనే కోల్పోయింది. 142/4 నుంచి 148 పరుగులకే ఆలౌట్ కావడం భారత బౌలింగ్ పటిమకు స్పష్టమైన నిదర్శనం.ఈ మ్యాచ్లో కెప్టెన్ ఆయుష్ మ్హాత్రే 4 ఓవర్లలో కేవలం 14 పరుగులు ఇచ్చి 3 వికెట్లు పడగొట్టగా, ఉద్ధవ్ మోహన్ కూడా 3 వికెట్లు తీసి ప్రత్యర్థిని కోలుకోకుండా చేశాడు. ఫలితంగా జింబాబ్వే 37.4 ఓవర్లలో 148 పరుగులకు కుప్పకూలింది.
ఈ భారీ విజయంతో భారత్ సూపర్-6 గ్రూప్-2లో పాయింట్ల పట్టికలో అగ్రస్థానంలో కొనసాగుతోంది. భారత జట్టు తదుపరి మ్యాచ్ ఫిబ్రవరి 1న చిరకాల ప్రత్యర్థి పాకిస్థాన్తో జరగనుండగా, ఆ మ్యాచ్ సెమీఫైనల్ బెర్త్ను ఖరారు చేసే దిశగా కీలకంగా మారనుంది.
