అక్షరటుడే, వెబ్డెస్క్ : Justice Suryakant | సుప్రీంకోర్టు తదుపరి ప్రధాన న్యాయమూర్తిగా సూర్యకాంత్ నియామకం కానున్నారు. ప్రస్తుతం సీజేఐ బీఆర్ గవాయ్ నవంబర్ 23న పదవీ విరమణ చేయనున్నారు. దీంతో తదుపరి ప్రధాన న్యాయమూర్తిగా జస్టిస్ సూర్యకాంత్ (Justice Suryakant) పేరును ఆయన ప్రతిపాదించారు. ఈ మేరకు కేంద్ర న్యాయ మంత్రిత్వశాఖకు సిఫారసు చేశారు.
జస్టిస్ బీఆర్ గవాయ్ (CJI BR Gawai) ఈ ఏడాది మే 14న ప్రధాన న్యాయమూర్తిగా బాధ్యతలు చేపట్టారు. ఆయన నవంబర్ 23న రిటైర్ కానున్నారు. దీంతో సంప్రదాయం ప్రకారం తన తదుపరి చీఫ్ జస్టిస్గా సూర్యకాంత్ పేరును ప్రతిపాదించారు. సీనియారిటీతో పాటు, అధికారం చేపట్టడానికి అన్ని అంశాలలో సూర్యకాంత్ తగినవాడని ఆయన పేర్కొన్నారు.
Justice Suryakant | హర్యానా నుంచి..
సూర్యకాంత్ హర్యానా (Haryana) లో జన్మించారు. మధ్య తరగతి కుటుంబంలో పుట్టిన ఆయన 1981లో హిసార్లోని ప్రభుత్వ పోస్ట్ గ్రాడ్యుయేట్ కళాశాల నుంచి పట్టభద్రుడయ్యారు. 1984లో రోహ్తక్లోని మహర్షి దయానంద్ విశ్వవిద్యాలయం నుంచి న్యాయశాస్త్రంలో బ్యాచిలర్ పట్టా పొందారు. 38 సంవత్సరాల వయస్సులో హర్యానాకు అతి పిన్న వయస్కుడైన అడ్వకేట్ జనరల్గా పని చేశారు.
జస్టిస్ సూర్యకాంత్ 2004లో పంజాబ్, హర్యానా హైకోర్టు న్యాయమూర్తిగా పదోన్నతి పొందారు. జడ్జిగా పని చేస్తూ కూడా ఆయన తన చదువు కొనసాగించడం గమనార్హం. 2011లో కురుక్షేత్ర విశ్వవిద్యాలయం నుంచి తన మాస్టర్ ఆఫ్ లాలో ఫస్ట్ క్లాస్ ఫస్ట్ సాధించారు.14 ఏళ్లు హైకోర్టు న్యాయమూర్తిగా పని చేసిన ఆయన 2018లో హిమాచల్ ప్రదేశ్ హైకోర్టు ప్రధాన న్యాయమూర్తిగా నియమితులయ్యారు. ఆ తర్వాత 2019 మే 24న సుప్రీంకోర్టు జడ్జి (Supreme Court Judge)గా పదోన్నతి పొందారు. తాజాగా 53వ భారత ప్రధాన న్యాయమూర్తిగా నియామకం కానున్నారు. జస్టిస్ బీఆర్ గవాయ్ ప్రతిపాదనలకు రాష్ట్రపతి ఆమోదం తెలిపిన తర్వాత ఆయన నియామకం ఖరారు కానుంది.
