అక్షరటుడే, వెబ్డెస్క్ : Supreme Court | తెలంగాణ అసెంబ్లీ స్పీకర్ గడ్డం ప్రసాద్కుమార్పై (Gaddam Prasad Kumar) సుప్రీంకోర్టు ఆగ్రహం వ్యక్తం చేసింది. తాము ఇచ్చిన గడువులోగా అనర్హత పిటిషన్లపై ఎటువంటి నిర్ణయం తీసుకోకపోవడంపై తీవ్ర వ్యాఖ్యలు చేసింది. ‘‘ఎమ్మెల్యేల అనర్హతపై మీరు నిర్ణయం తీసుకుంటారా.. మమ్మల్ని తీసుకోమంటారా’’ అని ప్రశ్నించింది.
బీఆర్ఎస్ నుంచి పది మంది ఎమ్మెల్యేలు కాంగ్రెస్లో చేరిన విషయం తెలిసిందే. వారిపై అనర్హత వేటు వేయాలని గతంలో బీఆర్ఎస్ నాయకులు సుప్రీంకోర్టులో (Supreme Court) పిటిషన్ వేశారు. దీనిపై విచారణ చేపట్టిన న్యాయస్థానం మూడు నెలల్లోపు చర్యలు చేపట్టాలని జులై 31న తీర్పు చెప్పింది. న్యాయస్థానం ఇచ్చిన గడువు అక్టోబర్ 31తో ముగిసింది. అయినప్పటికీ స్పీకర్ ఎలాంటి నిర్ణయం తీసుకోలేదు. దీంతో బీఆర్ఎస్ పార్టీ స్పీకర్పై కోర్టు ధిక్కార పిటిషన్ దాఖలు చేసింది. దీనిపై సోమవారం ధర్మాసనం విచారణ చేపట్టింది.
Supreme Court | స్పీకర్కు నోటీసులు
బీఆర్ఎస్ పిటిషన్ మేరకు తెలంగాణ స్పీకర్కు సుప్రీంకోర్టు నోటీసులు జారీ చేసింది. నాలుగు వారాల్లోగా జవాబు చెప్పాలని దేశ అత్యున్నత న్యాయస్థానం స్పీకర్ను ఆదేశించింది. మూడు నెల్లలోగా నిర్ణయం తీసుకోకపోవడం కోర్టు ధిక్కారమే అని సుప్రీంకోర్టు ప్రధాన న్యాయమూర్తి జస్టిస్ బీఆర్ గవాయి (Justice BR Gavai) అన్నారు. రోజువారీగా విచారణ జరిపి త్వరగా నిర్ణయం తీసుకోవాలని ఆదేశించారు. స్పీకర్ తరఫున న్యాయవాదులు అభిషేక్ సింగ్, ముకుల్ రోహత్గి వాదించారు. నాలుగు వారాల్లో విచారణ పూర్తి చేస్తామని వారు కోర్టుకు తెలిపారు.
కాగా.. స్పీకర్ గత నెలలో నలుగురు ఎమ్మెల్యేలను విచారించారు. ఈ నెలలో మరో నలుగురిని విచారించారు. దీంతో ఆయన ఎలాంటి నిర్ణయం తీసుకుంటారనే ఉత్కంఠ నెలకొంది. ఒకవేళ పార్టీ మారిన ఎమ్మెల్యేలపై వేటు వేస్తే రాష్ట్రంలో మళ్లీ ఉప ఎన్నికలు రానున్నాయి. అయితే అందరు ఎమ్మెల్యేలు కూడా తాము బీఆర్ఎస్లోనే ఉన్నట్లు స్పీకర్ విచారణ సందర్భంగా చెప్పినట్లు సమాచారం. కానీ కాంగ్రెస్ టికెట్పై ఎంపీగా పోటీ చేసిన దానం నాగేందర్కు (Danam Nagender) చిక్కులు తప్పే అవకాశం లేదు. అలాగే కడియం శ్రీహరి తన కూతురిని కాంగ్రెస్ టికెట్పై ఎంపీగా గెలిపించుకున్నారు. ఎన్నికల సమయంలో ఆయన ప్రచారం చేశారు. అలాగే బాన్సువాడ ఎమ్మెల్యే పోచారం శ్రీనివాస్ రెడ్డి (Pocharam Srinivas Reddy) పార్టీ మారిన అనంతరం ప్రభుత్వ సలహాదారుగా నియమితులయ్యారు. మిగతా వారు సాంకేతిక కారణాలతో తప్పించుకునే అవకాశం ఉన్నా.. వీరిపై ఎలాంటి నిర్ణయం తీసుకుంటారో చూడాలి.
