అక్షరటుడే, వెబ్డెస్క్: Stool Colors | మన శరీర అంతర్గత ఆరోగ్యం ఎలా ఉందో చెప్పడానికి మన విసర్జితాలే ప్రధాన సంకేతాలు. ముఖ్యంగా మలం రంగును బట్టి మన జీర్ణవ్యవస్థ, కాలేయం, ఇతర అవయవాల పనితీరును అంచనా వేయవచ్చు. మలవిసర్జన అనేది కేవలం వ్యర్థాలను బయటకు పంపే ప్రక్రియ మాత్రమే కాదు, అది మన శరీర ఆరోగ్యాన్ని ప్రతిబింబించే ఒక అద్దం వంటిది. సాధారణంగా ఆరోగ్యవంతుల్లో మలం గోధుమ రంగులో ఉంటుంది, కానీ రంగులో మార్పులు కనిపిస్తే అవి కొన్ని అనారోగ్యాలకు సూచనలు కావచ్చునని ఆరోగ్య నిపుణులు హెచ్చరిస్తున్నారు.
Stool Colors | రంగులు, సంకేతాలు:
ఆకుపచ్చ రంగు: కాలేయంలో తయారయ్యే పిత్తం (Bile) సహజంగా ఆకుపచ్చగా ఉంటుంది. ఆహారం జీర్ణక్రియ వేగంగా జరిగి, మలం పేగుల్లో ఎక్కువ సేపు ఉండనప్పుడు అది గోధుమ రంగులోకి మారే సమయం ఉండదు. దీనివల్ల మలం ఆకుపచ్చగా వస్తుంది. ఆకుకూరలు ఎక్కువగా తిన్నా లేదా కొన్ని ఇన్ఫెక్షన్ల వల్ల కూడా ఇలా జరగవచ్చు.
నలుపు రంగు: మలం నల్లగా రావడం అనేది జీర్ణవ్యవస్థలో ఏదైనా సమస్య ఉన్నప్పుడు జరుగుతుంది. ఐరన్ టాబ్లెట్లు వాడే వారికి ఇది సాధారణమే అయినా, అలా కాకుండా నల్లగా వస్తుంటే వెంటనే నిపుణులను సంప్రదించాలి. ఇది అంతర్గత రక్తస్రావానికి కూడా సంకేతం కావచ్చు.
పసుపు రంగు: మలంలో కొవ్వు శాతం ఎక్కువగా ఉన్నప్పుడు అది పసుపు రంగులోకి మారుతుంది. ప్యాంక్రియాస్ సమస్యలు లేదా ఇన్ఫెక్షన్ల వల్ల శరీరం కొవ్వును గ్రహించలేనప్పుడు ఇలా జరుగుతుంది. రెండు రోజుల కంటే ఎక్కువ కాలం ఈ రంగు కనిపిస్తే అప్రమత్తంగా ఉండాలి.
తెలుపు లేదా బూడిద రంగు: కాలేయం తగినంత పిత్తాన్ని ఉత్పత్తి చేయకపోయినా లేదా పిత్తాశయంలో రాళ్లు ఉన్నా మలం తెలుపు లేదా బంకమట్టి రంగులో వస్తుంది. ఇది కాలేయ సంబంధిత సమస్యలకు ప్రధాన లక్షణం.
ఎరుపు రంగు: మలం ఎర్రగా రావడం చాలా ప్రమాదకరం. ఇది పేగు ఇన్ఫెక్షన్లు, పాలిప్స్ లేదా పైల్స్ (హెమోరాయిడ్స్) వంటి సమస్యలను సూచిస్తుంది.
