అక్షరటుడే, హైదరాబాద్: Bathukamma | తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సంబురాలు వైభవంగా కొనసాగుతున్నాయి. తొమ్మిది రోజుల పాటు తెలంగాణ వీధుల్లో సందడి చేసే ఈ పూల పండుగ, తొలిరోజున ఎంగిలిపూల బతుకమ్మతో ప్రారంభమైంది. మూడు రోజులు ఎంగిలిపువ్వు, అటుకుల, ముద్దపప్పు బతుకమ్మ వేడుకలు ఘనంగా ముగిశాయి. ఇక నాలుగో రోజున తెలంగాణ ఆడపడుచులు నానబియ్యం బతుకమ్మ(Nanabiyyam bathukamma) గా పూజిస్తారు.
ఈ రోజు తంగేడు, గునుగు వంటి పూలతో నాలుగంతరాల బతుకమ్మను అందంగా పేరుస్తారు. పీఠంపై గౌరమ్మను నిలిపి పూజిస్తారు. ఈ రోజు ప్రధాన నైవేద్యం నానబియ్యం. రాత్రంతా నానబెట్టిన బియ్యాన్ని బెల్లం లేదా చక్కెరతో కలిపి ముద్దలుగా చేసి అమ్మవారికి నివేదిస్తారు. ఈ నైవేద్యాన్ని వాయనంగా అందరికీ పంచుతారు. బతుకమ్మ పాటలు పాడుతూ, ఆటలాడుతూ తెలంగాణ ఆడపడుచులు భక్తిశ్రద్ధలతో ఈ పండుగను జరుపుకుంటారు. బతుకమ్మ పండుగ ఈ సంప్రదాయాలను, సంస్కృతిని ప్రతిబింబిస్తూ ప్రజల జీవితంలో భాగమైంది. తొమ్మిది రోజులు కొనసాగే ఈ సంబురాలు సద్దుల బతుకమ్మతో ముగియనున్నాయి.
