అక్షరటుడే, వెబ్డెస్క్ : Smriti Mandhana | టీమిండియా మహిళా క్రికెట్ జట్టు వైస్ కెప్టెన్, స్టార్ ఓపెనర్ స్మృతి మంధాన (smriti) త్వరలో పెళ్లి పీటలు ఎక్కనుంది. తన ఆటతీరుతో పాటు వ్యక్తిగత జీవితంతో కూడా ఇప్పుడు ఆమె హాట్ టాపిక్‌గా మారింది.
స్మృతి మంధాన.. ప్రముఖ మ్యూజిక్ డైరెక్టర్ ,ఫిల్మ్ ప్రొడ్యూసర్ పలాష్ ముచ్చల్ మధ్య ఉన్న రిలేషన్‌షిప్ గురించి అభిమానులకు ఇప్పటికే తెలుసు. తాజాగా ఈ జంట పెళ్లిపై పలాష్ స్వయంగా కీలక ప్రకటన చేసి వార్తల్లో నిలిచారు. భారతదేశంలో జరుగుతున్న మహిళల ప్రపంచ కప్ 2025 నేపథ్యంలో ప్రస్తుతం ఇండోర్‌లో ఉన్న పలాష్ ముచ్చల్, స్థానిక మీడియాతో మాట్లాడుతూ తమ సంబంధాన్ని బహిరంగంగా ధృవీకరించారు. ఇండోర్ స్టేట్ ప్రెస్ క్లబ్‌లో జరిగిన ఓ కార్యక్రమంలో ఆయన మాట్లాడుతూ, “ఆమె (స్మృతి మంధాన) త్వరలో ఇండోర్ కోడలు కాబోతోంది. నేను చెప్పదలచుకున్నది అంతే… మీకు హెడ్‌లైన్ ఇచ్చేశాను!” అని ఉల్లాసంగా ప్రకటించారు.
Smriti Mandhana | త్వ‌ర‌లోనే గుడ్ న్యూస్..
ఇండోర్‌కు చెందిన పలాష్ మాటలతో స్మృతి త్వరలో ముచ్చల్ కుటుంబంలోకి అడుగుపెట్టబోతున్నట్లు స్పష్టమైంది. ఇది పలాష్-స్మృతి పెళ్లిపై వచ్చిన మొదటి అధికారిక ధృవీకరణగా నిలిచింది. ఇంతకుముందు వీరిద్దరూ సోషల్ మీడియా (Social media) వేదికగా తరచుగా కలిసి దిగిన ఫొటోలు పంచుకోవడం ద్వారా తమ బంధాన్ని హింట్‌గా చూపించారు. కానీ ఎప్పుడూ అధికారికంగా స్పందించలేదు. అయితే ఇప్పుడు పలాష్ మాటలతో ఆ ఊహాగానాలకు తెరపడింది. పెళ్లి తేదీ, వేదికకు సంబంధించిన వివరాలు ఇంకా వెల్లడికాలేదు కానీ ఈ జంట త్వరలో వైవాహిక బంధంలోకి అడుగుపెట్టబోతున్నారని ఆయన వ్యాఖ్యలు స్పష్టం చేశాయి. ఇక పలాష్ ముచ్చల్ తన ప్రేయసి స్మృతి మంధానతో పాటు భారత మహిళల జట్టుకు శుభాకాంక్షలు తెలిపారు. “నా శుభాకాంక్షలు కెప్టెన్ హర్మన్‌ప్రీత్ కౌర్, స్మృతితో పాటు మొత్తం జట్టుకి ఉన్నాయి. వారు ప్రతి మ్యాచ్ గెలిచి దేశానికి గౌరవం తీసుకురావాలని మనస్ఫూర్తిగా కోరుకుంటున్నాను,” అని ఇంగ్లండ్‌తో మ్యాచ్‌కి ముందు కామెంట్ చేశారు.
పలాష్ ముచ్చల్.. డిష్కియాన్, భూతనాథ్ రిటర్న్స్ వంటి చిత్రాలకు సంగీతం అందించాడు. 30 ఏళ్ల పలాష్, స్మృతి మంధానా మధ్య 2019 నుంచి డేటింగ్ జరుగుతోందనే వార్తలు వినిపిస్తున్నాయి. ఇక స్మృతి మంధాన ఇటీవల ఆస్ట్రేలియాపై (Australia) జరిగిన వన్డేలో 66 బంతుల్లో 80 పరుగులు చేసి అద్భుతమైన ఇన్నింగ్స్ ఆడారు. అదే మ్యాచ్‌లో వన్డే క్రికెట్‌లో 5000 పరుగుల మైలురాయిని కూడా చేరుకున్నారు. మైదానంలో విజయాలు సాధిస్తున్న ఈ స్టార్ బ్యాటర్, త్వరలో తన జీవితంలో మరో కొత్త ఇన్నింగ్స్ ప్రారంభించబోతున్నారు.
