అక్షరటుడే, వెబ్డెస్క్: Riddhi Kumar | ఇండియాస్ బిగ్గెస్ట్ సూపర్ స్టార్ ప్రభాస్ (Prabhas) హీరోగా నటిస్తున్న లేటెస్ట్ మూవీ ‘ది రాజా సాబ్’ (Raja Saab) విడుదలకు సిద్ధమవుతోంది. కామెడీ చిత్రాలతో తనకంటూ ప్రత్యేక గుర్తింపు తెచ్చుకున్న దర్శకుడు మారుతి దర్శకత్వంలో తెరకెక్కిన ఈ హారర్–కామెడీ థ్రిల్లర్ను పీపుల్ మీడియా ఫ్యాక్టరీ బ్యానర్పై టీజీ విశ్వప్రసాద్ నిర్మిస్తున్నారు.
నిధి అగర్వాల్, మాళవిక మోహనన్, రిద్ది కుమార్ (Riddhi Kumar) హీరోయిన్లుగా నటిస్తున్న ఈ చిత్రం, ప్రభాస్ కెరీర్లో తొలిసారిగా ఈ జానర్లో వస్తుండటంతో ప్రేక్షకుల్లో భారీ అంచనాలు ఏర్పడ్డాయి. షూటింగ్ పూర్తిచేసుకున్న ఈ సినిమా సంక్రాంతి కానుకగా 2026 జనవరి 9న ప్రపంచవ్యాప్తంగా విడుదల కానుంది.రిలీజ్కు సమయం దగ్గరపడటంతో హైదరాబాద్లో గ్రాండ్గా నిర్వహించిన ప్రీ రిలీజ్ ఈవెంట్కు చిత్ర బృందం మొత్తం హాజరయ్యింది.
Riddhi Kumar | రిద్ది కామెంట్స్కి సూపర్బ్ రెస్పాన్స్..
ముఖ్యంగా ప్రభాస్ అభిమానులు (Prabhas Fans) పెద్ద సంఖ్యలో పాల్గొని వేడుకను పండుగ వాతావరణంలోకి తీసుకువచ్చారు. ఈ వేదికపై దర్శకుడు మారుతి, నిర్మాతలు, నటీనటులు సినిమాపై తమ అభిప్రాయాలను పంచుకున్నారు. అయితే ఈ ఈవెంట్లో హీరోయిన్ రిద్ది కుమార్ చేసిన వ్యాఖ్యలు ప్రత్యేక ఆకర్షణగా నిలిచి సోషల్ మీడియాలో వైరల్గా మారాయి. వేదికపై మాట్లాడిన రిద్ది కుమార్, ప్రభాస్తో కలిసి పనిచేసిన అనుభవాన్ని ఎంతో ఆప్యాయంగా గుర్తు చేసుకున్నారు. ప్రభాస్ గారి సినిమా చేయడం తనకు చాలా సంతోషాన్ని ఇచ్చిందని ఆమె అన్నారు. మూడు సంవత్సరాల క్రితం ప్రభాస్ తనకు బహుమతిగా ఇచ్చిన చీర తనకు ఎంతో ప్రత్యేకమైన జ్ఞాపకమని, అదే చీరను ధరించి ఈ రోజు ప్రీ రిలీజ్ ఈవెంట్కు వచ్చానని వెల్లడించారు. ఆమె ఈ మాటలు చెప్పగానే ప్రాంగణం మొత్తం అభిమానుల నినాదాలతో మార్మోగింది.
అభిమానులు పెద్ద ఎత్తున ప్రభాస్ పేరు జపించడంతో ఆ క్షణాలు మరింత ఉత్సాహంగా మారాయి. దీనికి సంబంధించిన వీడియోలు, ఫొటోలు ప్రస్తుతం సోషల్ మీడియాలో వేగంగా వైరల్ అవుతున్నాయి. రిద్ది కుమార్ వ్యాఖ్యలు సినిమాపై ఉన్న అంచనాలను మరింత పెంచాయి. ప్రభాస్తో తన అనుబంధాన్ని సహజంగా వివరించడం, ఆయన వ్యక్తిత్వంపై ఆమె వ్యక్తం చేసిన అభిప్రాయాలు అభిమానులకు బాగా నచ్చాయి. ఇప్పటికే విడుదలైన టీజర్లు, పాటలు, ప్రమోషనల్ అప్డేట్స్కు మంచి స్పందన రావడంతో ‘ది రాజా సాబ్’ పై అంచనాలు రోజురోజుకీ పెరుగుతున్నాయి. రిద్ది కుమార్ కెరీర్ విషయానికి వస్తే, ఆమె తెలుగు చిత్ర పరిశ్రమలో ‘లవర్’ సినిమాతో నటిగా పరిచయమై, ఆ తర్వాత మలయాళం, మరాఠీ చిత్రాల్లోనూ నటించారు. వెబ్ సిరీస్ల ద్వారా డిజిటల్ ప్లాట్ఫామ్లోనూ తన ప్రతిభను చాటుకున్నారు. మహారాష్ట్రలోని పుణేలో జన్మించిన రిద్ది, ఫెర్గ్యూసన్ కాలేజ్ నుంచి ఉన్నత విద్య పూర్తి చేశారు.
