Ram Charan Twins Names | మెగా ఇంట ఘ‌నంగా కవలల నామకరణ వేడుక.. ‘శివరామ్’, ‘అన్వీరా దేవి’ పేర్ల వెనుక ఆధ్యాత్మిక భావం

అక్షరటుడే, వెబ్​డెస్క్​: Ram Charan Twins Names | మెగా అభిమానులు ఎంతో ఆసక్తిగా ఎదురుచూసిన క్షణం ఎట్టకేలకు వచ్చింది. గ్లోబల్ స్టార్ రామ్ చరణ్–ఉపాసన (Ram Charan – Upasana) కామినేని కొణిదెల దంపతులు ఇటీవల జన్మించిన తమ కవల చిన్నారుల నామకరణ వేడుకను హైదరాబాద్‌ (Hyderabad)లోని తమ నివాసంలో అత్యంత సన్నిహితుల మధ్య ఘనంగా నిర్వహించారు.

ఈ సందర్భంగా కుమారుడికి “శివరామ్” (Sivaram), కుమార్తెకు “అన్వీరా దేవి” (Anveera Devi) అనే పేర్లు పెట్టిన‌ట్టు అధికారికంగా ప్రకటించారు. కుటుంబ సభ్యులు, సన్నిహిత బంధువుల సమక్షంలో సంప్రదాయబద్ధంగా జరిగిన ఈ వేడుక మెగా ఇంట పండుగ వాతావరణాన్ని మరింత ఉత్సాహభరితంగా మార్చింది. పిల్లల పేర్ల వెనుక ఉన్న అర్థాన్ని రామ్ చరణ్ స్వయంగా వెల్లడించడం ప్రత్యేకంగా నిలిచింది.

Ram Charan Twins Names | చిరు పేరు క‌లిసేలా..

పిల్లలకు పేరు పెట్టడం కేవలం ఒక ఆచారం మాత్రమే కాదు, అది మాకు ఆధ్యాత్మిక నిర్ణయం అని ఆయన పేర్కొన్నారు. కుమారుడి పేరు ‘శివరామ్’లో శివుడు, రాముడు అనే ఇద్దరు దైవాల ఆధ్యాత్మిక భావం నిండి ఉందని, అంతేకాకుండా తన తండ్రి మెగాస్టార్ చిరంజీవి (Megastar Chiranjeevi) అసలు పేరు ‘శివశంకర్ వరప్రసాద్’లోని ‘శివ’ భాగాన్ని కూడా కలిపినట్టు తెలిపారు. ఇది తండ్రిపైనున్న గౌరవానికి ప్రతీక అని చరణ్ చెప్పడం అభిమానులను ఆకట్టుకుంది. కుమార్తె పేరు ‘అన్వీరా దేవి’ గురించి చెబుతూ “అపారమైన ధైర్యం, దైవిక శక్తి” అనే భావనను ప్రతిబింబించేలా ఈ పేరును ఎంపిక చేసినట్టు వెల్లడించారు. ‘వీర’ అంటే ధైర్యం, ‘దేవి’ అంటే శక్తి అని అర్థమని, తమ పిల్లలు శక్తివంతంగా, దయతో పెరగాలనే ఆశయానికి ఈ పేర్లు ప్రతీకలని రామ్ చరణ్ వివరించారు.

ఈ వ్యాఖ్యలు సోషల్ మీడియా (Social Media)లో  వైరల్ అవుతూ మెగా అభిమానులను మరింత ఉత్సాహపరిచాయి. మరోవైపు ఉపాసన రెండోసారి మాతృత్వాన్ని ఆస్వాదిస్తున్న అనుభూతిని పంచుకున్నారు. “మొదటిసారి తల్లిగా మారినప్పుడు ఎంతో కొత్తగా, కొంత గందరగోళంగా అనిపించేది. ఇప్పుడు మాత్రం చాలా ప్రశాంతంగా ఉంది. చిన్న విషయాలకు ఆందోళన పడకుండా రిలాక్స్‌గా ఉండగలుగుతున్నాను” అని తెలిపారు. ముగ్గురు పిల్లలను ఒకేచోట చూసినప్పుడు కలిగే ఆనందం అమూల్యమని, ముఖ్యంగా పెద్ద కూతురు క్లిన్ కారా కొణిదెలను రామ్ చరణ్ ఎంతో ప్రేమగా చూసుకుంటున్నారని చెప్పుకొచ్చారు. తమ పిల్లలను బాధ్యత గల పౌరులుగా తీర్చిదిద్దాలనే లక్ష్యాన్ని ఈ దంపతులు వెల్లడించారు. వారసత్వం అంటే కేవలం ఆస్తులు ఇవ్వడం కాదని, సమాజానికి తిరిగి ఇవ్వడమే నిజమైన వారసత్వమని ఉపాసన భావోద్వేగంగా పేర్కొన్నారు.