అక్షరటుడే, వెబ్డెస్క్: Raipur T20 one ball 11 runs record | రాయ్పూర్ వేదికగా భారత్–న్యూజిలాండ్ (New Zealand) జట్ల మధ్య జరిగిన రెండో టీ20 మ్యాచ్లో క్రికెట్ అభిమానులు ఇప్పటివరకు చూడని అరుదైన సంఘటన ఒకటి జరిగింది. సాధారణంగా ఒక బంతికి నాలుగు లేదా ఆరు పరుగులు రావడం సహజమే కానీ, ఒకే ఒక్క లీగల్ డెలివరీకి ఏకంగా 11 పరుగులు రావడం మాత్రం ఎవరికైనా ఆశ్చర్యమే. కానీ రాయ్పూర్ మైదానంలో అదే జరిగింది. న్యూజిలాండ్ యువ బౌలర్ జకారీ ఫౌల్క్స్ వేసిన ఓవర్ సోషల్ మీడియాలో ఇప్పుడు చర్చనీయాంశంగా మారింది. భారత ఇన్నింగ్స్ మూడో ఓవర్లో ఈ విచిత్ర పరిస్థితి ఏర్పడింది. ఆ ఓవర్ ప్రారంభంలో స్ట్రైక్లో ఇషాన్ కిషన్ ఉన్నాడు. ఫౌల్క్స్ వేసిన తొలి బంతి నోబాల్గా మారడంతో పాటు దానికి ఇషాన్ బౌండరీ బాదాడు. దీంతో ఒక్కసారిగా ఐదు పరుగులు వచ్చాయి. వెంటనే తర్వాత రెండు డెలివరీలు వరుసగా వైడ్లుగా వెళ్లాయి. అంటే ఒక్క లీగల్ బంతి కూడా పడకముందే భారత్ స్కోరు బోర్డుపై ఏడు పరుగులు చేరాయి.
Raipur T20 one ball 11 runs record | బౌలర్కి చేదు అనుభవం..
చివరకు అతను వేసిన మొదటి అధికారిక బంతిని ఇషాన్ మరోసారి ఫోర్గా మలిచాడు. దీంతో ఒకే ఒక్క లీగల్ డెలివరీ పూర్తయ్యే సరికి టీమిండియా ఖాతాలో మొత్తం 11 పరుగులు చేరడం విశేషంగా మారింది. ఇంతటితో ఆ ఓవర్ ముగిసిపోలేదు. ఫౌల్క్స్ రెండో లీగల్ బంతిని వేయడానికి కూడా పలు ప్రయత్నాలు చేయాల్సి వచ్చింది. ఆ తర్వాతి డెలివరీలలో ఇషాన్ కిషన్ (Ishan Kishan) మరో ఫోర్తో పాటు చివరి బంతికి భారీ సిక్సర్ బాదాడు. ఫలితంగా ఆ ఓవర్ మొత్తం 10 బంతుల పాటు సాగి, భారత్కు ఏకంగా 24 పరుగులు అందించింది. ఈ ఓవర్ బౌలర్కు భయంకరమైన అనుభవంగా మారితే, స్టేడియంలో ఉన్న ప్రేక్షకులకు మాత్రం పూర్తి స్థాయి ఎంటర్టైన్మెంట్ ఇచ్చింది.
ఆ సుదీర్ఘ ఓవర్లో నమోదైన పరుగుల క్రమం చూస్తే నోబాల్తో వచ్చిన బౌండరీ, వరుస వైడ్లు, కీలక సమయంలో వచ్చిన ఫోర్లు, చివరలో బాదిన సిక్సర్ అన్నీ కలిపి ఆ ఓవర్ను మ్యాచ్లో ప్రత్యేకంగా నిలిపాయి. అయితే ఈ హంగామా మధ్య భారత్కు ఆరంభంలోనే ఎదురుదెబ్బలు తగిలాయి.
ఓపెనర్లు సంజూ శామ్సన్, అభిషేక్ శర్మ (Abisekh Sharma) త్వరగానే పెవిలియన్ చేరడంతో ఒత్తిడి పెరిగింది. కానీ ఇషాన్ కిషన్ ఆ ఒక్క ఓవర్లో చేసిన దూకుడు బ్యాటింగ్తో జట్టుకు ఊపునిచ్చే ప్రయత్నం చేశాడు. టీ20 క్రికెట్లో ఒకే బంతికి 11 పరుగులు రావడం చాలా అరుదైన విషయం కావడంతో, రాయ్పూర్ మ్యాచ్లో జరిగిన ఈ సంఘటన అభిమానులకు చిరకాలం గుర్తుండిపోయే ఘట్టంగా నిలిచింది. ఇక మ్యాచ్లో ఇషాన్ కిషన్ తోడుగా కెప్టెన్ సూర్యకుమార్ యాదవ్ తనదైన శైలిలో బ్యాటింగ్ ఝుళిపించడంతో రెండో టీ20లోను టీమిండియా ఘన విజయం సాధించింది.
