అక్షరటుడే, వెబ్డెస్క్ : Weather Updates | రాష్ట్రంలోని పలు ప్రాంతాల్లో సోమవారం వర్షాలు కురిసే అవకాశం ఉందని వాతావరణ శాఖ అధికారులు తెలిపారు. ముఖ్యంగా రాత్రిపూట కుండపోత వానలు కురుస్తాయన్నారు.
తెలంగాణ(Telangana)లోని భువనగిరి, నల్గొండ, సూర్యాపేట, జనగామ, మహబూబాబాద్, ములుగు, భద్రాద్రి కొత్తగూడెం జిల్లాలో ఆదివారం రాత్రి నుంచి భారీ వర్షం కురిసింది. సోమవారం ఉదయం వరకు కూడా కుండపోత వాన పడుతూనే ఉంది. మధ్యాహ్నం తర్వాత ఈ జిల్లాల్లో వర్షాలు తగ్గుముఖం పడుతాయని అధికారులు తెలిపారు. అనంతరం సాయంత్రం వరకు వాతావరణం పొడిగా ఉంటుంది. మిగతా జిల్లాల్లో సైతం సాయంత్రం వరకు వర్షాలు పడే అవకాశం లేదు. ఆకాశం మేఘావృతమై ఉంటుంది. రాత్రి పూట పలు చోట్ల భారీ వర్షాలు(Heavy Rains) పడుతాయని, ప్రజలు అప్రమత్తంగా ఉండాలని అధికారులు హెచ్చరించారు.
Weather Updates | ఆ జిల్లాలకు అలెర్ట్..
హైదరాబాద్(Hyderabad) నగరంలో ఉదయం నుంచి చిరుజల్లులు కురిశాయి. సాయంత్రం వరకు వాతావరణం పొడిగా ఉంటుంది. రాత్రిపూట మోస్తరు వర్షం పడే ఛాన్స్ ఉంది. ములుగు, వరంగల్, మహబూబాబాద్, మంచిర్యాల, హన్మకొండ, భూపాలపల్లి జిల్లాల్లో మధ్యాహ్నం వరకు భారీ వర్షాలు కురుస్తాయి. కొత్తగూడెం, జనగామ జిల్లాల్లో తేలికపాటి జల్లులు కురుస్తాయి.
Weather Updates | భువనగరిరిలో వర్ష బీభత్సం
యాదాద్రి భువనగిరి(Yadadri Bhuvanagiri) జిల్లాలో వర్షం బీభత్సం సృష్టించింది. ఆదివారం ఉదయం 8:30 గంటల నుంచి సోమవారం ఉదయం 8 గంటల వరకు అత్యధికంగా భువనగిరి జిల్లా వలిగొండలో 190.8 మి.మీ. వర్షం కురిసింది. ఆత్మకూర్లో 131, దత్తప్పగూడలో 120.5, మహబూబాబాద్ జిల్లా అయ్యవారిపల్లెలో 117.8, కొత్తగూడెం జిల్లా సత్యనారాయణపురంలో 114 మి.మీ. వర్షపాతం నమోదైంది.
