అక్షరటుడే, ఇందూరు: Nizamabad Collector | నిజామాబాద్ నగర సమగ్ర అభివృద్ధి కోసం ప్రణాళికాబద్ధంగా కృషి చేయాలని కలెక్టర్ వినయ్ కృష్ణారెడ్డి (Collector Vinay Krishna Reddy) సూచించారు. మున్సిపల్ కార్పొరేషన్ కార్యాలయంలో (Municipal Corporation office) గురువారం సమీక్ష నిర్వహించారు. ఈ సందర్భంగా కలెక్టర్ మాట్లాడుతూ.. వార్డ్ ఆఫీసర్లు తమ డివిజన్లో నెలకొన్న పరిస్థితులపై స్పష్టమైన అవగాహన కలిగి ఉండాలన్నారు.
అప్పుడే సమస్యలను గుర్తించి పరిష్కారానికి కృషి చేయగలరని తెలిపారు. ఖాళీ స్థలాలను గుర్తించి వాటి పరిరక్షణ కోసం కంచె ఏర్పాటు చేయాలన్నారు. పచ్చదనాన్ని పెంపొందించేలా విరివిగా మొక్కలు నాటించాలని ఆదేశించారు. పారిశుధ్యంపై ప్రత్యేక దృష్టిని కేంద్రీకరించాలన్నారు. చెత్త సేకరణ వాహనాలు (garbage collection vehicles) నిత్యం ఇంటింటికి వెళ్లి తడి, పొడి చెత్త సేకరించేలా కృషి చేయాలన్నారు. అవకాశం ఉన్నచోట డ్రెయినేజీలను శుభ్రపరిచేందుకు జేసీబీలను వినియోగించాలని చెప్పారు. చెడిపోయిన యంత్రాలు, స్వీపింగ్ వెహికల్స్కు మరమ్మతులు చేయించి వినియోగంలోకి తీసుకురావాలని సూచించారు.
Nizamabad Collector | ఇందిరమ్మ ఇళ్ల నిర్మాణాలు వేగవంతం కావాలి
ఇందిరమ్మ ఇళ్ల (Indiramma houses) నిర్మాణాలు వేగంగా జరిగేలా చొరవ చూపాలని కలెక్టర్ సూచించారు. పట్టణ, గ్రామీణ ప్రాంతాల్లో 400 చదరపు అడుగుల కంటే తక్కువ స్థలం ఉన్నవారు కూడా జి ప్లస్ వన్ పద్ధతిలో ఇందిరమ్మ పథకం కింద ఇల్లు నిర్మించుకునేందుకు ప్రభుత్వం అనుమతించిందన్నారు. ఈ విషయాన్ని లబ్ధిదారులకు విస్తృత స్థాయిలో అవగాహన కల్పించాలని సూచించారు. లబ్ధిదారులు ఇల్లు నిర్మాణాలు చేపట్టి సకాలంలో పూర్తి చేసుకునేలా ప్రోత్సహించాలని చెప్పారు. సమావేశంలో అదనపు కలెక్టర్ అంకిత్, నగరపాలక సంస్థ కమిషనర్ దిలీప్ కుమార్, హౌసింగ్ డీఈ నివర్తి, మున్సిపల్ డిప్యూటీ కమిషనర్ రవిబాబు తదితరులు పాల్గొన్నారు.
