అక్షరటుడే, వెబ్డెస్క్ : Vote Chori | ఢిల్లీ (Delhi)లో విపక్ష ఎంపీలు సోమవారం చేపట్టిన ఆందోళన ఉద్రిక్తతకు దారి తీసింది. బీహార్ (Bihar)లో ప్రత్యేక ఓటరు జాబితా సవరణ(SIR)కు వ్యతిరేకంగా, ఓటు చోరీ అంశంపై విపక్ష ఎంపీలు పార్లమెంట్ (Parliament) నుంచి మార్చ్ నిర్వహించారు. 2024 పార్లమెంట్ ఎన్నికలు, మహారాష్ట్ర ఎన్నికల్లో ఓటు చోరీ జరిగిందని లోక్సభ ప్రతిపక్ష నేత రాహుల్ గాంధీ (Rahul Gandhi) ఇటీవల ఆరోపించిన విషయం తెలిసిందే.
ఓటు చోరీ, బీహార్లో ఎన్నికల జాబితా సవరణను నిరసిస్తూ ఇండియా (INDIA) కూటమితో పాటు విపక్ష పార్టీల ఎంపీలు ఆందోళన నిర్వహించారు. ఇందులో భాగంగా పార్లమెంట్ నుంచి ఎన్నికల సంఘం (Election Commission) కార్యాలయం వరకు మార్చ్ తలపెట్టారు. 25 ప్రతిపక్ష పార్టీలకు చెందిన 300 మందికి పైగా లోక్సభ, రాజ్యసభ ఎంపీలు ఈ నిరసనలో పాల్గొన్నారు. అయితే విపక్ష ఎంపీల మార్చ్ను పోలీసులు అడ్డుకున్నారు.
Vote Chori | అనుమతి లేదని..
విపక్ష ఎంపీల మార్చ్ను అడ్డుకున్న పోలీసులు.. ర్యాలీకి అనుమతి లేదని తెలిపారు. సంసద్‌ మార్గ్‌లో భారీగా పోలీసులు మోహరించారు. ఎంపీలు మార్చ్ సాగే మార్గంలో బారీకేడ్లు ఏర్పాటు చేసి రోడ్డును బ్లాక్ చేశారు. అయితే పలువురు ఎంపీలు బారికేడ్లపైకి ఎక్కడంతో ఉద్రిక్తత చోటు చేసుకుంది. మార్చ్లో పాల్గొన్న రాహుల్ గాంధీ, ప్రియాంక గాంధీ సహా పలువురు విపక్ష ఎంపీలను పోలీసులు అరెస్ట్ చేసి అక్కడి నుంచి తరలించారు.
Vote Chori | రాహుల్ గాంధీ ఆధ్వర్యంలో..
రాహుల్ గాంధీ ఆధ్వర్యంలో ఓటు చోరీకి వ్యతిరేకంగా విపక్ష ఎంపీలు మార్చ్ నిర్వహించారు. ఉదయం 11.30 గంటలకు పార్లమెంట్ నుంచి ప్రారంభమైంది. మధ్యాహ్నం 12 గంటలకు విపక్ష ఎంపీలు ఈసీని కలిసి వినతి పత్రం ఇవ్వడానికి అపాయింట్మెంట్ తీసుకున్నారు. అయితే పోలీసులు అడ్డుకోవడంతో ఉద్రిక్తత నెలకొంది. సమాజ్వాది పార్టీ అధ్యక్షుడు, ఎంపీ అఖిలేష్ యాదవ్ (Akhilesh Yadav) బారీకేడ్లపై ఎక్కి దూకడానికి యత్నించారు. ఈ ర్యాలీలో కాంగ్రెస్, సమాజ్‌వాదీ పార్టీ, టీఎంసీ, డీఎంకే, ఆప్, వామపక్ష పార్టీలు, ఆర్జేడీ, ఎన్సీపీ (SP), శివసేన (UBT), నేషనల్ కాన్ఫరెన్స్ తదితర పార్టీలు పాల్గొన్నాయి. పోలీసులు తమను అడ్డుకోవడం సమాజ్వాద్ ఎంపీ రాంగోపాల్ యాదవ్ ఆగ్రహం వ్యక్తం చేశారు. ఢిల్లీ వీధుల్లో నడవడానికి ఎంపీలకు పోలీసుల అనుమతి అవసరం లేదని ఆయన పేర్కొన్నారు. కాగా 30 ఎంపీలకు మాత్రమే తమను కలవడానికి అపాయింట్మెంట్ ఇచ్చినట్లు ఈసీ తెలిపింది.