Kavitha on SIT | చట్టానికి ఎవరూ అతీతులు కాదు.. సిట్​ పిలిస్తే విచారణకు వెళ్తా : కవిత

అక్షరటుడే, వెబ్​డెస్క్: Kavitha on SIT | ఫోన్​ ట్యాపింగ్​ వ్యవహారంలో సిట్​ విచారణపై అధ్యక్షురాలు కల్వకుంట్ల కవిత స్పందించారు. చట్టానికి ఎవరూ అతీతులు కారన్నారు.

కవిత సోమవారం మీడియాతో మాట్లాడారు. కేసీఆర్​ను సిట్​ విచారించిన అనంతరం కేటీఆర్​ (KTR) మీడియాతో మాట్లాడిన విషయం తెలిసిందే. ఆయన సిట్​ విచారణను తప్పు పట్టారు. అయితే కేటీఆర్​ వ్యాఖ్యలకు కవిత కౌంటర్​ ఇచ్చారు. ప్రజా జీవితంలో ఉన్నప్పుడు అన్నింటిని ఎదుర్కోవాల్సి ఉంటుందన్నారు. వారి ఆలోచన విధానంలో మార్పు రానన్ని రోజులు బీఆర్​ఎస్​ను ఎవరు కాపాడలేరన్నారు. మున్సిపల్ ఎన్నికల (Municipal Elections) వరకు ఈ కేసు విచారణ పేరిట హడావుడి చేస్తున్నారని ఆమె ఆరోపించారు. ఈ కేసు విచారణ పూర్తి చేసి నిందితులను శిక్షించాలని డిమాండ్​ చేశారు. ఈ కేసులో తనను సిట్​ అధికారులు విచారణకు పిలిస్తే హాజరు అవుతానని తెలిపారు.

Kavitha on SIT | మంచి వారిని గెలిపించాలి

మున్సిపల్ ఎన్నికల్లో పని చేసే అభ్యర్థులను గెలిపించాలని కవిత కోరారు. గుడ్డిగా పార్టీ గుర్తు చూసి ఓటు వేయొద్దన్నారు. తమ జాగృతి నాయకులు సైతం పలు చోట్ల పోటీ చేస్తున్నట్లు తెలిపారు. వారు ఆల్ ఇండియా ఫార్వర్డ్​ బ్లాక్​ పార్టీ పేరిట పోటీలో ఉంటారన్నారు. సాధ్యమైనంత వరకు మంచి వారికే టికెట్లు ఇచ్చామన్నారు. వారిని గెలిపించాలని ప్రజలను కోరారు.

Kavitha on SIT | తెలంగాణకు అన్యాయం

కేంద్ర బడ్జెట్​లో తెలంగాణ (Telangana)ను విస్మరించారని కవిత విమర్శించారు. విద్య, వైద్య రంగాలకు కేటాయింపులు తక్కువగా ఉన్నాయన్నారు. రాష్ట్ర ప్రభుత్వం 47 అంశాల మీద అడిగితే బడ్జెట్​లో కేంద్రం ఒక్కదానికి కూడా నిధులు ఇవ్వలేదన్నారు. సీఎం రేవంత్​రెడ్డి (CM Revanth Reddy) 30 సార్లు ఢిల్లీకి వెళ్లినా.. రూ.30 వేల కోట్లు కూడా తేలేకపోయారన్నారు.

Kavitha on SIT | వారికి ఆయుధాలు ఇవ్వాలి

ఎక్సైజ్​ కానిస్టేబుల్ సౌమ్య (Excise Constable Soumya) మృతిపై కవిత ఆవేదన వ్యక్తం చేశారు. ఆమె గాయపడితే.. సీఎం కనీసం ట్వీట్​ చేయలేదన్నారు. ఎక్సైజ్​ పోలీసులపై దాడులను అరికట్టడానికి వారికి ఆయుధాలు ఇవ్వాలని ఆమె డిమాండ్​ చేశారు. అలాగే ఫారెస్ట్​ సిబ్బందికి సైతం వెపన్స్​ ఇవ్వాలన్నారు. హైదరాబాద్​ నగరంలో అనేక అగ్ని ప్రమాదాలు జరుగుతున్నాయని పేర్కొన్నారు. మున్సిపల్​ శాఖ మంత్రిగా ఉన్న సీఎం అగ్ని ప్రమాదాల నివారణకు చర్యలు చేపట్టాలని డిమాండ్​ చేశారు.

Kavitha on SIT | ఫేక్​ ఎంవోయూలు

రాష్ట్రానికి పెట్టుబడుల కోసం నిర్వహించిన గ్లోబల్​ సమ్మిట్ (Global Summit)​పై కవిత స్పందించారు. ఊరు పేరు లేని కంపెనీలు వేల కోట్లు పెట్టుబడులు పెడతామని ఒప్పందాలు చేసుకున్నాయని విమర్శించారు. రూ.లక్షల విలువైన కంపెనీలు సైతం వేల కోట్లకు ఎంవోయూలు చేసుకున్నాయని పేర్కొన్నారు. ఇవన్నీ ఫేక్​ అన్నారు. దీనిపై రాష్ట్రవ్యాప్తంగా నిరసన కార్యక్రమాలు చేపడుతామని కవిత తెలిపారు.