అక్షరటుడే, హైదరాబాద్: Muthoot Finance Results | దేశీయ గోల్డ్ లోన్ మార్కెట్లో తిరుగులేని ఆధిపత్యాన్ని ప్రదర్శిస్తూ ముత్తూట్ ఫైనాన్స్ లిమిటెడ్ అద్భుతమైన ఆర్థిక ఫలితాలను (Muthoot Finance Results) ప్రకటించింది. 2025-26 ఆర్థిక సంవత్సరం తొమ్మిది నెలల కాలానికి (9M FY26) గానూ సంస్థ తన చరిత్రలోనే ఎన్నడూ లేని విధంగా అత్యున్నత స్థాయి గణాంకాలను నమోదు చేసింది.
Muthoot Finance | లాభాల్లో భారీ వృద్ధి
గత ఏడాది ఇదే కాలంతో పోలిస్తే ముత్తూట్ గ్రూప్ ఏకీకృత నికర లాభం (Consolidated PAT) 84 శాతం పెరుగుదలతో రూ. 7,209 కోట్లకు చేరింది. కేవలం మూడవ త్రైమాసికంలోనే (Q3 FY26) కంపెనీ లాభం 103 శాతం జంప్ చేసి రూ. 2,823 కోట్లుగా నమోదైంది. గత ఏడాది ఇదే త్రైమాసికంలో ఈ లాభం రూ. 1,392 కోట్లు మాత్రమే ఉండటం గమనార్హం.
రుణ ఆస్తుల (AUM) ప్రభంజనం
ముత్తూట్ గ్రూప్ (Muthoot Finance) నిర్వహణలో ఉన్న మొత్తం రుణ ఆస్తులు (Consolidated AUM) 48 శాతం వార్షిక వృద్ధితో రూ. 1,64,720 కోట్లకు చేరుకున్నాయి. ఇందులో కంపెనీ ప్రధాన బలమైన బంగారు రుణాల విభాగం వాటా అత్యధికంగా ఉంది. గోల్డ్ లోన్ ఏయుఎం 50 శాతం వృద్ధితో రూ. 1,39,658 కోట్లకు చేరి కొత్త రికార్డును సృష్టించింది.
విజయానికి కీలక కారణాలు
బంగారం ధరల ప్రభావం: మార్కెట్లో బంగారం ధరలు పెరగడం వల్ల కస్టమర్ల రుణ సామర్థ్యం (LTV) మెరుగుపడింది. ఇది కంపెనీ వ్యాపార వృద్ధికి భారీగా తోడ్పడింది.
విస్తృత నెట్వర్క్: దేశవ్యాప్తంగా 7,541 శాఖలు, 50 వేల మందికి పైగా అంకితభావం కలిగిన ఉద్యోగులతో ముత్తూట్ తన సేవలను మరింత వేగవంతం చేసింది.
సానుకూల వాతావరణం: కేంద్ర బడ్జెట్ 2026లోని ఆర్థిక స్థిరీకరణ చర్యలు, ఆర్బీఐ పాలసీ రేట్లు, జీఎస్టీ రేట్ల తగ్గింపు వంటి అంశాలు చిన్న వ్యాపారస్తుల నుండి క్రెడిట్ డిమాండ్ పెరగడానికి దోహదపడ్డాయి.
అనుబంధ సంస్థల జోరు: మైక్రోఫైనాన్స్ విభాగం తిరిగి పుంజుకుని లాభాల్లోకి రావడం, ఇతర అనుబంధ సంస్థలు కూడా 12 శాతం వరకు ఏయుఎం వాటాను అందించడం విశేషం.
ముత్తూట్ ఫైనాన్స్ రికార్డు ఫలితాలు :
9 నెలల లాభం: గత ఏడాది మొదటి 9 నెలలతో పోలిస్తే, ఈసారి లాభం 84% పెరిగి రూ. 7,209 కోట్లకు చేరింది.
తాజా 3 నెలల లాభం (Q3): అక్టోబర్ నుండి డిసెంబర్ వరకు కేవలం మూడు నెలల్లోనే కంపెనీ రూ. 2,823 కోట్ల లాభాన్ని ఆర్జించింది. ఇది గత ఏడాది కంటే 103% ఎక్కువ, అంటే లాభం ఏకంగా రెట్టింపు అయ్యింది.
మొత్తం రుణాలు: కంపెనీ ద్వారా ప్రజలు తీసుకున్న మొత్తం రుణాల విలువ రూ. 1,64,720 కోట్లు. ఇది గతేడాది కంటే 48% పెరిగింది.
బంగారు రుణాలు (Gold Loans): కేవలం బంగారంపై ఇచ్చిన రుణాలే రూ. 1,39,658 కోట్లకు చేరాయి. అంటే గతేడాది కంటే 50% అధికంగా బంగారు రుణాలు పెరిగాయి.
