అక్షరటుడే, వెబ్‌డెస్క్‌: Helmet : మధ్యప్రదేశ్​(Madhya Pradesh)లోని ఇండౌర్​(Indore)లో తాజాగా కఠినమైన ట్రాఫిక్ ఆంక్షలు అమలులోకి తీసుకొచ్చారు. ద్విచక్ర వాహనదారులు తప్పనిసరిగా హెల్మెట్​ ధరించాలనే నిబంధనను కఠినంగా అమలు చేస్తున్నారు. ఇంధన బంకుల్లోనూ ఆంక్షలు విధించారు. ‘నో హెల్మెట్.. నో పెట్రోల్’ ‘No helmet.. no petrol’ నిబంధన తీసుకొచ్చారు. అంటే ద్విచక్ర వాహనదారుడు హెల్మెట్​ లేకుండా బంకులోకి వస్తే.. పెట్రోల్​ ఇవ్వొద్దనే ఆంక్షలు అమలు చేస్తున్నారు.

ఆగస్టు ఒకటి నుంచి బైకర్లు తప్పనిసరిగా హెల్మెట్​ ధరించాలనే నిబంధనను పటిష్ఠంగా అమలు చేస్తున్నారు. కాగా, ఓ ద్విచక్ర వాహనదారుడు ఈ నిబంధనను ఉల్లంఘించాడు. ఓ ఇంధన బంకులోకి వాహనంతో వెళ్లాడు. అయితే అతగాడు హెల్మెట్​ ధరించలేదు.

బైకర్లు నిర్లక్ష్యం వహించినా.. ఇంధన బంకు యజమానులు మాత్రం కఠినంగా వ్యవహరించాల్సి ఉంది. కానీ, ఇక్కడ ఇంధన బంకు సిబ్బంది కూడా లైట్​గా తీసుకున్నారు. ప్రభుత్వం విధించిన నిబంధనను తుంగలో తొక్కారు. దీంతో అధికారులు ఈ వ్యవహారంపై సీరియస్​ అయ్యారు. ఏకంగా ఆ బంకునే సీజ్​ చేశారు.

Helmet : నిర్లక్ష్యంగా వ్యవహరించి..

ఇంతకీ ద్విచక్ర వాహనదారుడు(పాల విక్రేత) ఏం చేశాడంటే.. హెల్మెట్​ ధరించకుండా పెట్రోల్​ కోసం వచ్చాడు. బంకులోకి వచ్చాక.. తలపై పాల క్యాన్​ మూతను పెట్టుకుని పెట్రోల్​ కోసం లైన్​లో నిలబడ్డాడు. అయితే, బంకు సిబ్బంది అతగాడిని పట్టించుకోకుండా, సర్కారు నిబంధనను తుంగలో తొక్కి నిర్లక్ష్యంగా.. ఆ బైకరుకు పెట్రోల్​ పోశారు.

ఈ వ్యవహారం కాస్త ఎవరో చిత్రీకరించి నెట్టింట పోస్ట్​ చేయడంతో.. అదికాస్త వైరల్​గా మారింది. దీంతో అధికారులు స్పందించి దర్యాప్తు చేపట్టారు. నిబంధనలు అతిక్రమించి పెట్రోల్​ పోసిన బంకరుపై అధికారులు సీరియస్​ అయ్యారు. సదరు బంకు(fuel station)ను అధికారులు సీజ్​ చేశారు.

నో హెల్మెట్​.. నో పెట్రోల్​ నిబంధనను తప్పనిసరిగా అమలు చేయాలని అధికారులు స్పష్టం చేశారు. ఎవరైనా అతిక్రమిస్తే.. ఏడాది కాలం జైలు శిక్ష, లేదా రూ. ఐదు వేల జరిమానా.. లేదంటే రెండింటిని విధించే అవకాశం ఉందని హెచ్చరించారు.