అక్షరటుడే, వెబ్డెస్క్ : Maruti e Vitara EV | మారుతి సుజుకీ (Maruti Suzuki) ఇండియా తన తొలి బ్యాటరీ విద్యుత్ వాహనం ఈ-విటారాను విడుదల చేసింది. బ్యాటరీ యాజ్ ఎ సర్వీస్ (బాస్) పథకం కింద దీనిని రూ.10.99 లక్షలకు అందించబోతోంది. ఈ ధరలో బ్యాటరీ ఖర్చు ఉండదు. కస్టమర్లు బ్యాటరీని అద్దెకు తీసుకుని కిలోమీటరుకు రూ.3.99 చెల్లించాలి. 61, 49 కిలోవాట్ అవర్ బ్యాటరీ ప్యాక్లతో ఈ-విటారాలు లభ్యమవుతాయి. 49 కిలోవాట్ బ్యాటరీ 440 కిలోమీటర్లు, 61 కిలోవాట్ల బ్యాటరీ 543 కిలోమీటర్ల మైలేజీ ఇస్తాయని కంపెనీ తెలిపింది.
ఫాస్ట్ చార్జర్ ద్వారా 45 నిమిషాల్లో 80 శాతం చార్జ్ అవుతుందని పేర్కొంది. ఇంటి వద్ద చార్జింగ్ కోసం 7.4 కిలోవాట్ ఏసీ వాల్ బాక్స్ హోమ్ చార్జర్తో పాటు రూ.50 వేల విలువైన ఇన్స్టలేషన్ ప్రక్రియ ఉచితమని తెలిపింది. 120 లిథియమ్ అయాన్ ఆధారిత సెల్స్తో అధిక సామర్థ్యమున్న బ్యాటరీ ఈ వాహనంలో ఉంది. అడ్వాన్స్డ్ డ్రైవర్ అసిస్టెన్స్ సిస్టమ్ (అడాస్ లెవల్ 2), అడాప్టివ్ క్రూయిజ్ కంట్రోల్, లేన్ కీప్ అసిస్ట్, అడాప్టివ్ హై బీమ్ సిస్టమ్, బ్లైండ్ స్పాట్ మానిటరింగ్ వంటి సదుపాయాలు ఈ కారులో ఉన్నాయి.
Maruti e Vitara EV | వారంటీ..
ఇ-విటారా వాహనానికి మూడేళ్లు, బ్యాటరీకి 8 ఏళ్లు లేదా 1.6 లక్షల కిలోమీటర్ల దూరం వారంటీ ఇస్తోంది. అదనంగా కొంత మొత్తాన్ని చెల్లించడం ద్వారా వాహన వారంటీని 5 ఏళ్ల వరకు పొడిగించుకోవచ్చు. మార్చి 31 వరకు ఈ ప్రారంభ ఆఫర్ అందుబాటులో ఉండనుంది. 3 ఏళ్ల ఓనర్షిప్ ప్లాన్తో 60 శాతం విలువ వరకు అష్యూర్డ్ బైబ్యాక్ ఆప్షన్ ఉంటుంది. నెక్సా విక్రయశాలలు, నెక్సా వెబ్సైట్లో రూ.21 వేలు చెల్లించి ఈ వాహనాలను బుక్ చేసుకోవచ్చు.
